ЗГХЭГ-ын дарга Л.Оюун-Эрдэнэ цаг үеийн асуудлаар сэтгүүлчдийн асуултад хариулав.

-Үндсэн хуулийн өөрчлөлтийн төслийг энэ долоо хоногт чуулганаар хэлэлцэхээр төлөвлөжээ. Та үүнд ямар байр суурьтай байна вэ?

-Өнөөдрийн нийгэм, эдийн засгийн хурдацтай энэ үед шилжилтийн үеийн Үндсэн хууль хариу өгч чадахгүй байгаа. Тиймээс Үндсэн хуулийн өөрчлөлтийг  хэлэлцэх нь зөв. Хэлэлцсэн шийдвэрүүдээ ард түмний санал асуулгаар шүүлгэх эсэхийг парламент ярих байх.

-Ерөнхийлөгч Захиргааны хэргийн хуульд хориг тавьсан.  Захиргааны хэрэг дээрх хэргүүд ямар явцтай байгаа бол?

-“Эрдэнэт”-ийн 49 хувь, 51 хувь, С.Зориг агсны хэрэг, бондын зэрэг хэзээ дуусах нь тодорхой хэргүүд байдаг. Хуулийн байгууллагаас энэ хэргүүдийг прокурор хянах ажиллагаа дуусч байгаа гэсэн. Эдгээр нийгэмд дуулиан дэгдээсэн 10 гаруй хэргүүд удахгүй шүүхэд шилжих юм билээ. “Эрдэнэт”-ийн 49 хувийн хэрэг дээр шүүгч н.Хувьтөгөлдөр гэж хүн энэ хэргийг шийдээд ажлаасаа гарсан ч  яах вэ гэсэн байр суурь илэрхийлсэн байна лээ. Энэ хүн шүүхийг биш ХХБ-ийг төлөөлж байна уу гэж хармаар.

-Хөөн хэлэлцэх хугацааны тухайд?

-Хөөн хэлэлцэхтэй холбоотой асуудал маргааны шинжтэй явж байна. Энэ их маргаантай асуудал. Юутай ч "Стандарт" банктай холбоотой "Эрдэнэт" дээр хохирол үүссэн. "Эрдэнэт" 30 сая ам.доллар төлсөн.  "Жаст"-ын Батхүүгийн  бусдад шилжүүлсэн хөрөнгийг зарах замаар "Эрдэнэт"-ийг хохиролгүй болгох ёстой. 

-“Оюутолгой”-н ажлын хэсгийн дүгнэлтийг хэлэлцэх үү?

-УИХ-аас ажлын хэсэг байгуулан ажиллаж байгаа. Засгийн газарт тодорхой хэмжээний шаардлага өгөх байх.

Н.Энх