Төрийн байгуулалтын байнгын хороо хуралдаж байна. Хуралдаанаар Үндсэн хуульд нэмэлт өөрчлөлт оруулах хуулийн төслийн нэг дэх хэлэлцүүлгийг хийж байгаа юм. Хэлэлцэж байгаа асуудалтай холбогдуулан гишүүд асуулт тавьж, хариулт авч байна.
УИХ-ын гишүүн Д.Эрдэнэбат:
-Үндсэн хуульд өөрчлөлт оруулах хуулийн төсөлд Ерөнхийлөгчийн саналыг аваагүй, УИХ-д өргөн барьсаныг Ерөнхийлөгч хэвлэлийн мэдээнээс мэдсэн гэжээ. Өмнө нь Ерөнхийлөгчид өргөн барьж санал авахаар хүргүүлсэн. Ерөнхийлөгч Үндсэн хуулийн өөрчлөлтийн төслийн эцсийн хувилбарыг ирүүлэх хариу явуулсан байна. Үндсэн хуульд нэмэлт өөрчлөлт оруулах төслийг Ерөнхийлөгч, Засгийн газрын саналыг аваагүй байна. Тиймээс энэ хуулийн төслийн хэлэлцүүлгийг өнөөдөр хойшлуулах хүсэлт хүргүүлж байна.
Төрийн байгуулалтын байнгын хорооны дарга С.Бямбацогт:
-Үндсэн хуульд нэмэлт өөрчлөлт оруулах дэгийг зөрчиж хэлэлцэх гэж байна гэж Ерөнхийлөгчөөс УИХ-д ирсэн байна. Энэ талаар УИХ-ын Тамгын газрынхан тайлбар ирүүлсэн байна. Үндсэн хуульд өөрчлөлт оруулах ажлын хэсэг Ерөнхийлөгчөөс санал авахаар хүргүүлсэн. Хуулийн дэгээр хариу ирүүлээгүй бол тусгайлан ирүүлэх саналгүй гэж үзэх заалттай юм билээ. Ерөнхийлөгчийн зүгээс таван чиглэлд санал хүргүүлсэн байсан.
УИХ-ын гишүүн Д.Лүндээжанцан:
-Үндсэн хуульд нэмэлт өөрчлөлт оруулах журмын хуулийг хэлэлцсэн. Үе үеийн парламентын гишүүд энэ асуудал дээр яриа болдог. Миний хувьд Үндсэн хуулийг хуулиар оруулах нь зүйтэй гэсэн саналыг дэмжиж байсан. Харин Үндсэн хуулиараа явах хэрэгтэй гэсэн санал давамгайлсан.
Бид Үндсэн хуульд нэмэлт өөрчлөлт оруулах төслөөр Ерөнхийлөгчтэй аль болох зөвшилцөхийн төлөө явсан.
Төрийн байгуулалтын байнгын хорооны хуралдаан үргэлжилж байна.
Уншиж байна |