Цагаачлалын хямралын талаар твиттерт бичсэн тайлбараасаа болж Дональд Трамп ардчилсан намынхан болон хүний эрхийн хамгаалагчдын зүгээс дахин шүүмжлэлтэй тулгарсан талаар “Америкийн дуу хоолой” мэдээллээ. 

Эх сурвалжийн мэдээлснээр, хууль бус цагаачид түр орогнох төвүүдийн нөхцөл байдалд сэтгэл дундуур байгаа бол эх орондоо буцсан нь дээр гэж Ерөнхийлөгч Трамп лхагва гаригт твиттер хуудсандаа бичсэн байна. 

Үүнээс өмнө, Ардчилсан намаас сонгогдсон хууль тогтоогчдын бүлэг Мексикийн хилтэй ойр байгуулсан цагаачдын түр байранд очиж танилцсаны дараа,  цагаачдад зориулсан төвийн нөхцөл байдал “аймшигтай”, ус, хүнс болон бусад наад захын хэрэгцээний зүйлсээр хангагдаагүй нөхцөлд олон мянган хүнийг байрлуулж байгаа талаар мэдэгдэл хийсэн юм. 

Улмаар мягмар гаригт Дотоодын аюулгүй байдлын яамны ерөнхий байцаагч Техас дахь цагаачдыг орогнуулах төвд авсан гэрэл зургуудыг нийтлэсэн байна. Эдгээр зурагнууд дээр төвийн ачаалал хэтэрсэн, хүмүүс шахцалдсан, зай талбай муутай газар байрлаж байгаа нь харагджээ. 

Харин үүний дараа Ерөнхийлөгч Дональд Трамп “Богино хугацаанд баригдсан, хүмүүсийг байлгахын тулд өөрчлөн засварласан төвүүдэд амьдрах нөхцөл байдал хууль бус цагаачдад таалагдахгүй байгаа бол тэднийг битгий ир гээд л хэлчих. Ингээд л бүх асуудал шийдэгдэнэ” хэмээн твиттер хуудсандаа бичжээ. 

Өнөөдөр мөн л энэ сэдвээр “жиргэсэн” бөгөөд “Манай хилчид эмнэлгийн ажилтнууд биш, эмч, сувилагч биш. Хилийн албаныхан шаардлагатайгаас ч давсан их ажил сайн гүйцэтгэсэн. Энэ хууль бус цагаачдын ихэнх нь эх орондоо амьдарч байснаасаа ч илүү сайн, аюулгүй нөхцөлд амьдарч байгаа” хэмээсэн байна. 

Г.Бямбасүрэн