“Хөвсгөлийн хөөрхөн цагдаа” хэмээн цахим хуудсанд алдаршиж эерэг энерги түгээж буй Хөвсгөл аймгийн Их-Уул сумын хэсгийн төлөөлөгч, цагдаагийн дэслэгч М.Батхолбоотой холбогдож цөөн хором ярилцлаа. Тэрбээр өдгөө Хөвсгөл аймгийн Тариалан суманд албан үүргээ гүйцэтгэж яваа.

М.Батхолбоо 1995 оны наймдугаар сарын 15-нд төрсөн. Багаасаа цагдаа болохыг хүсдэг байжээ. Мөрөөдлөө биелүүлэхээр 2013 онд ХСИС-д элсэн суралцаж 2018 онд цагдаа, хууль сахиулах мэргэжил эзэмшин төгсчээ. Төгссөн оныхоо зургадугаар сарын 28-нд анхны томилолтоо аваад Хөвсгөл аймгийн Улаан-Уул сумын зорьсон байна. Удалгүй Хөвсгөл аймгийн Их-Уул сумын хэсгийн төлөөлөгчөөр томилогдоод байгаа гэнэ.

Ажилдаа чин сэтгэлээсээ “дурласан”, албандаа үнэн зүрхнээсээ “хайртай” түүний жолооч нарыг хэсэгхэн ч гэсэн амраахаар дохиж зогсоосоон үйлдэл нь өнөөдөр хайр түгээж, хар бараанаар дүүрсэн цахим хуудсыг эерэг энергээр цэнэглэж байна.

Цахим хуудсанд эерэг, гэгээлэг хандлагыг түгээгч Батмөнхийн гэр бүлийнхэн анхлан түүний талаар пост оруулсан. Тэд “Хөвсгөл орохын алдад зам дээр цагдаа зогсчихсон манай машиныг зогс гээд зогсоод ямар нэг зөрчил гаргалаа гээд торгох гэж байгаа юм байхдаа гэж бодсон юм. Тэгсэн “Амрыг эрье, аян замдаа сайн явж байна уу. За ядарч байна уу. Энд буугаад биеийнхээ чилээг гаргаад бие засаарай, тэнд 00 байгаа гэж байна.Тэгэхээр нь нэг л сайхан дотно санагдаад сайхан байсан шүү” хэмээн цахим хуудсандаа бичсэн нь олон мянган хүнд хүрээд байна.

Энэ талаар М.Батхолбоогоос асуувал “Тэр өдөр бямба гараг байсан. Маш халуун өдөр байсан шүү. Би тухай өдөр Хөвсгөл аймгийн Тариалан сумын хяналтын постон дээр ажиллаж байлаа. Маш халуун байсан учраас жолооч нар их ядарсан, зарим нь нойрмоглосон байдалтай ажиглагдсан. Тиймээс түр ч гэсэн амраад биеийн чилээгээ гаргаад аваг гээд дүрэм зөрчөөгүй ч зогсоогоод “амраад хөдлөөрэй” гэдэг санал тавьсан.

Зогсоогоод “Та буугаад шилээ арччих. Тэгээд хэсэгхэн ч гэсэн амраад хөдлөөрэй” гэсэн чинь зарим жолооч нар бүр маш их гайхаад “Миний шил цэвэрхэн л байна шүү дээ” хэмээж байсан. Гэхдээ ихэнх жолооч нар  эерэгээр хүлээн авч байсан шүү. Тэр нь надад маш сайхан санагдсан” гэв.

М.Батхолбоо эхнэр, хоёр хүүхэдтэй. Түүний гэргий үрсийнхээ хамт Улаанбаатар хотод амьдарч буй гэнэ. Гэр бүлээсээ хол байх хэцүү юу гэвэл “Үгүй дээ, энэ миний дурлаж сонгосон мэргэжил учраас хэцүү зүйл үгүй. Харин ч Хөвсгөл аймгийн Улаан-Уулаас Улаанбаатар хотод жаахан ч гэсэн дөхөж Их-Уул суманд ирээд байгаа” хэмээн цог золбоотой хариулж байна.

Өөрийнхөө талаар цахим хуудаснаас олж уншив уу гэвэл “Би өнөөдөр л олж харлаа. Танилууд маань утасдаад л чиний тухай бичсэн байна гэж байсан. Надад их сайхан эерэг сэтгэгдэл төрж урам зориг хайрлаж байна. Ер нь тэгээд хаана ч явсан үүргээ нэр төртэй биелүүлж албаныхаа нэрийг өндөрт өргөж явахыг туйлаас хүсдэг” хэмээсэн юм.

М.Батхолбоо шиг албандаа үнэнчээр зүтгэж, ард олныхоо аюулгүй байдлын төлөө сэтгэл чилээж яваа цагдаагийн алба хаагчид олон доо... Цагдаагийн албаны ирээдүй гэгээн байна.

Тээврийн цагдаагийн албанаас зам тээврийн ослоос урьдчилан сэргийлэх зорилгоор “Яараад яахав дээ” аяныг эхлүүлээд байгаа. Энэ аяны эхний зөв тусгал энэ гэлтэй. Нээрэн нэг хором амраад биеийн алжаалаа тайлаад хөдлөхөд яарах юу байх вэ.

Г.Сүрэн