Орост анхны хувийн автозам барих төслийг ОХУ-ын Ерөнхий сайд Дмитрий Медведев дэмжсэн талаар Ведомости мэдээллээ.
Хоёр мянга гаруй километрийн урттай зам нь Европ, Хятадыг холбож, энэ хоёр чиглэлийн хооронд ачаа тээвэрлэх хамгийн дөт маршрут болох юм.
Төслийг санаачилагч нь “Русская холдинговая компания” бөгөөд хөрөнгө оруулалт татах, тэр дундаа Хятадаас хөрөнгө оруулалт татах асуудлаар зөвлөлдөхийг Тээврийн яам, Барилгын яам, Сангийн яам болон Эдийн засгийн хөгжлийн яаманд Дмитрий Медведев үүрэг болгосон гэж эх сурвалж дамжуулжээ.
Эх сурвалжийн мэдээлснээр дээрх компани ирээдүйд баригдах замын коридорт газрын 80 хувийг хэдийнэ худалдан авсан гэнэ.
“Меридиан” гэх нэртэй энэ замыг Казахстантай хиллэдэг хилээс эхлэн барихаар төлөвлөж байгаа бөгөөд төслийн өртөг 600 тэрбум рублиэр үнэлэгдэж байгаа аж.
Энэ төслийг хэрэгжүүлэхэд улсын төсвөөс ямар ч хөрөнгө гарахгүй, харин хувиараа барьж байгуулж буй компани улсаас жилд 35 тэрбум рублийн баталгаат орлогыг хангах ёстой гэсэн нөхцөл тавьжээ.
Г.Бямбасүрэн
Уншиж байна |