Оросын Ньюс-фронт мэдээллийн агентлаг Оросын холбоотнууд болон улс орны нөхөрсөг харилцаа гэж юу болохыг эргэцүүлэх үндсэн дээр бүх цаг үед тусласаар байгаа монголчуудын тусыг уншичиддаа сануулах "Оросын холбоотнууд ба Оросын "холбоотнуудын" тухай" нэртэй нийтлэл гаргасныг орчуулан хүргэж байна. 

Манай улс баялаг түүхтэй том улс. Тиймдээ ч бидэнд найз нөхөд ч бий, ил далд дайснууд ч бий. Ил тодоор найрамдалт харилцааг тунхагласан ч далдуур муу санаа өвөрлөн явах ч улсууд байдаг. Харин юу ч тунхаглаад зарлаад байдаггүй хэрнээ хүнд үед чив чимээгүй л тусламжийн гараа сунгадаг улсууд ч бий. 

Бидэнд “найзууд” олон бий. Бид Европын, Балканы, Азийн зэрэг олон орнуудтай “нөхөрлөдөг”. 

Жишээ нь ах дүүгийн харилцаат Белоруссыг аваад үзье. Москватай мөнхийн найрамдалт харилцаатай гэж чанга дуугаар зарладаг Лукашенко Ерөнхийлөгч НАТО-г түшиглэн Кремль рүү нуруугаа харуулах гэж үе үе үзэх нь бий. 

Эсвэл жишээ нь Армен ч юм уу. Тийм ээ, бид тэдэнтэй нягт харилцаатай байж, 1915 оны геноцидийн үеэр армянчуудыг аварч, манай оронд армянчууд олноор амьдардагийн дээр, Орос байгаагүй бол Уулын Карабахын асуудал Туркийн идэвхитэй дэмжлэгтэйгээр Азербайжаны талд шийдэгдэх байлаа. Гэвч одоо энэ улс манай эртний геополитикийн сөргөлдөгч АНУ-тай нягт харилцаатай болохоор чармайж байна. 

Мөн Монгол улс гэж бий. Асар өргөн уудам нутагтай, эртнээс мал аж ахуй эрхэлж ирсэн /энд дуулгахад Монголд газрын эрдэс нөөцийг үйлдвэрлэлийн хэмжээгээр олборлож байгаа/ , Улаанбаатарын захаар өнөө хэр нь нүүдэлчдийн гэрээс бүрдсэн хорооллуудтай улс. Монголчууд бол агуу Чингис хаан, мөн Оросын эртний судар бичигт нэр нь үлдсэн Төмөр хааны удам. Харин Оросын түүхийн цуст хуудаснуудын нэг болсон татар-монголын дарлалыг манай дунд сургуулиудад үздэг. 

Монгол бол баян улс биш, ДНБ-ээрээ ОУВС-ийн жагсаалтад 115 дугаарт бичигддэг, далайд гарцгүй. Аялал жуулчлалын хувьд ч хүндрэлтэй, учир нь Монгол улсын ихэнх хэсэгт говь цөл, мөн явахад хэцүү уул хадтай. Монгол улс Хамтын аюулгүй байдлын гэрээний байгууллага, БРИКС, ШХАБ зэрэг Орос улс хэрэгцээ гарвал дэмжлэг тус хүлээж болохоор байгууллагуудын гишүүн биш. 

Гэвч яагаад ч юм чухамхүү Монгол улс л хөрш орондоо туслахаар чимээгүйхэн ирдэг. Ямар ч илүү үгс, сүртэй мэдэгдэл хийлгүйгээр туслана. Агуу их эх орны дайны үед Монгол улс сая орчим Зөвлөлтийн дайчныг дулаан гутал хувцсаар хангаж байв. Хэдэн арван тонн мах, тос, хиам, танкийн батальон, хагас сая адуу гээд энэ бүхнийг гэрт амьдардаг, нэн ядуу орноос өгсөн гээд төсөөлөөд үз дээ. Энэ бол хамгийн сүүлийн өрийг нь 2006 онд төлсөн Америкийн ленд-лиз биш. Энэ бол Зөвлөт холбоот улсад үзүүлсэн ах дүүгийн тусламж байлаа. Монгол улс ЗХУ-д нацистын Герман дайн зарласныг өөрийн улсад нь дайн зарласан мэтээр хүлээн авсан юм. 

ЗХУ-ын ачаар л ядуу буурай байсан энэ орон аж үйлдвэржсэн, хөгжингүй анагаах ухаан, боловсролтой орон болсон учраас тэр гэж бодож  болох. Гэхдээ энэ бол тун буруу, Хаант Орос улс Европыг Наполеоны эзлэн түриймгийллээс, харин ЗХУ Гитлерээс хамгаалж байлаа. Харин Европ огт ач санадаггүй. Харин Монгол улс санадаг. 

Одоо ч гэсэн, Эрхүү мужийн олон суурин усанд автахад, монголчууд, чимээгүйхэн, илүү дутуу шуугиан гаргалгүй, гурил, махан бүтээгдэхүүн, дулаан хөнжил гээд шаардлагатай эд зүйл бүхий хүмүүнлэгийн ачаа илгээжээ. 

Улаанбаатарт хохирогчдод туслах  хандивын штаб ажиллаж байгаа бол хүүхдийн зуслангууд  100 хүртэлх хүүхдийг хүлээн авч, амрааж, эртний түүхтэй орныхоо соёл уламжлалтай танилцуулахад бэлэн байна. Ямар ч сүр бадруулалгүйгээр шүү. Олон улсын тавцанд дуулиантай мэдэгдэл хийлгүйгээр зүгээр л туслацгаасан. Эртний нөхөрлөлөөрөө л тусаллаа. 

Бид Оросын нөхөд, холбоотны талаар ярихдаа Францын эсэргүүцлийг, Италийн Мессина газар хөдлөлтийн улмаас сүйрч байсан хотод хамгийн түрүүн туслахаар ирсэн Оросын далайчдыг дурсдаг, Грекийн Корфд адмирал Ф.Ф.Ушаковын цээж хөшөө босгосон   зэргийг дурсаж болно л доо. 

Гэхдээ яагаад ч юм Орос улс гагцхүү Монголоос л ах дүүгийн, хөршийн ёсны бодит тусламж ирж байгааг  харах юм. Үүнийх нь төлөө монголчуудад хүн ёсоор талархаж байна. 

Г.Бямбасүрэн