Засгийн газрын ээлжит хуралдаа боллоо. Хуралдаанаар хэлэлцсэн асуудлын талаар ЗТХ-ын сайд Б.Энх-Амгалан мэдээлэл хийв. Тэрбээр:
-Тавантолгой-Гашуунсухайт чиглэлийн 208.5 км төмөр замын барилгын ажлыг наймдугаар сарын 15-ны өдрөөс үргэлжлүүлж 2021 онд ашиглалтад оруулахаар шийдвэрлэлээ. Төмөр замын суурь бүтцийн барилгын ажлын зөвшөөрлийг “Тавантолгой төмөр зам” ХХК-д олгож, суурь бүтэц, барих, ашиглахад шаардагдах хөрөнгийг тухай бүр техник, эдийн засгийн үндэслэлд заасан дүнгээр нүүрс урьдчилан борлуулах болон бусад эх үүсвэрээс санхүүжүүлнэ.
Мөн Тавантолгой-Зүүнбаянгийн чиглэлийн замын зургийн ажил явагдаж байна. Нийтдээ туслан гүйцэтгэгчээр 8 компани ажиллаж байгаа. Үйл ажиллагаа хэвийн явагдаж байгаа.
Өнгөрсөн долоо хоногт Дархан, Налайхын автозамын ажилтай танилцсан. Улаанбаатар хотын ЗДТГ-аас хяналт тавьж байгаа. Монгол, Хятадын хооронд дипломат харилцаа тогтоосны 70 жилийн ойн хүрээнд хийгдэж байгаа учраас энэ жилдээ ашиглалтад оруулна.
Дарханы автозамыг барихад таван компаин шалгарсан. Нэг, гурав, тавдугаар багцын ажил сайн явагдаж байгаа. Хоёр, дөрөвдүгээр багцын ажил хоцрогдолтой байгаа. Европын сэргээн босголтын гэрээ УИХ-аар батлагдсанаар ажил цаг хугацаандаа явна.
Доной болоод Цагаандэглийн нисэх буудлын ажил удахгүй дуусч нээлтээ хийнэ. Говь-Алтай-Баянхонгорын зам сайн явагдаж байна. Энэ жилдээ 100 км замыг ашиглалтад оруулна. Завханы Загастайн давааны чиглэлийн зам явагдаж байна хэмээгээд сэтгүүлчдийн сонирхсон асуултад хариулав.
-Дарханы түр замын ажил ямар явцтай байна вэ?
-Дарханы түр замд улсын төсвөөс 6.5 тэрбум төгрөг баталж өгсөн. Энэ замуудыг хайргалж байгаа. Энэ жил бороо хур ихтэй, зам харгуй эвдрэлтэй байна. Байгалийн хүчин зүйл нөлөөлж байна. Бороо хур ихтэй байгаа. Иймээс түр замаа хаагаад үндсэн замаараа явуулж байна. Гүйцэтгэгч компани хугацаанд нь ашиглалтад оруулна гэж байгаа.
-"Эрдэнэс тавантолгой"-н замын санхүүжилтийг хаанаас гаргах вэ?
-"Эрдэнэс тавантолгой" компанид 2019 оноос өмнө 600 тэрбум төгрөг байгаа гэсэн. Нүүрсийг урьдчилан борлуулах замаар мөнгө босгож болно. Одоогийн байдлаар дөрвөн компани нүүрс худалдаж авах санал тавьж байгаа. Энэ зам ашигтай учир санхүүжилтийн хувьд зогсохгүй байх. Тиймээс ажлыг наймдугаар сарын 15-наас ажлыг эхлүүлэхээр ярьж байна.
Н.Энх