100 хувь цахилгаанаар ажилладаг эко автомашиныг ялгамжтай буюу ногоон дэвсгэр бүхий улсын дугаартай болгох ажил Монгол Улсын стандартад аль хэдийнэ нэвтэрч,  хэрэгжиж эхэлсэн. Энэ талаар Авто тээврийн үндэсний төвийн дэд захирал Х.Баярхүүгээс тодрууллаа.

-Одоогоор улсын хэмжээнд хичнээн цахилгаан машин бүртгэлтэй байгаа вэ?

-Улсын хэмжээнд 223 бүрэн цахилгаан автомашин бий. Үүний 209 нь Улаанбаатар хотод, 14 нь орон нутагт бүртгэлтэй байна.

-Цахилгаан машинуудад ногоон дэвсгэртэй дугаар олгоно гэсэн. Дугаарыг олгож эхэлсэн үү. Ийм дугаар авахын тулд хаана хандах вэ?

-Олгож эхэлсэн байгаа. Авто тээврийн үндэсний төвийн тээврийн хэрэгслийн бүртгэлийн салбар төвүүдэд хандаж авна. Улаанбаатар хотод долоон цэг мөн 21 аймагт салбар төвүүд байгаа.

-Эко улсын дугаартай болсноор ямар давуу талтай вэ?

Байгаль орчинд ээлтэй, цахилгаан машины хэрэглээг нэмэгдүүлэхэд эерэг нөлөөтэй. Үүнээс гадна ногоон дугаартай болсноор нэгдүгээр эгнээгээр зорчих боломжтой.

-Өмнө нь энгийн улсын дугаартай байсан хүн эко дугаараар солихдоо  зөвхөн дэвсгэр өнгөө л солих уу?

-Дугаараа бүрэн солино. Учир нь ногоон өнгийн дэвсгэртэй улсын дугаарын үсэг нь өөр болсон байгаа.

-Эко дугаар авахад хэдэн төгрөг төлөх шаардлагатай вэ?

Тусгай үнэ байхгүй. Энгийн дугаарын үнээ төлөөд л авна. Цахилгаан машины нэг жилийн татвар 1920 төгрөг байгаа.

А.Хулан