Өнгөрсөн амралтын өдөр АНУ-ын Техас болон Охайо мужид халдлага гарч олон хүний амь үрэгдсэн. Үүнтэй холбоотойгоор АНУ-ын Ерөнхийлөгч Дональд Трамп амиа алдагсдын дурсгалыг хүндэтгэн гурван өдрийн үндэсний хэмжээний гашуудал зарлажээ. Улмаар наймдугаар сарын наймныг хүртэл АНУ болон тус улсын хилийн чанад дахь төр захиргааны байгууллагууд төрийн далбааг бөхийлгөх юм байна.
Ийнхүү үндэсний хэмжээний гашуудал зарлах болсон нь ердөө 13 цагийн дотор тус улсад хоёр халдлага үйлдэгдэж, 29 хүн амиа алдсантай холбоотой юм.
Бямба гаригт винтовоор зэвсэглэсэн эр Техас мужийн Эль-Пасо дахь Walmart дэлгүүрт гал нээсний улмаас 20 хүн амиа алдаж, 30 гаруй хүн шархадсан байна. Энэ аймшигт хэргийг үйлдсэн 21 настай эр цагдаагийнханд бууж өгчээ.
Үүнээс өмнө Охайо мужийн Дейтон хотод гэмт этгээд 9 хүнийг хороож, 27 хүнийг шархадуулсан байна. Халдлага үйлдсэн 24 настай Коннор Бетс гэгчийг цагдаагийнхан буудсан бөгөөд түүнийг ганцаараа энэ хэргийг үйлдсэн гэдгийг тогтоожээ. Харин хэрэг үйлдэх болсон шалтгаан нь тодорхойгүй байгаа гэнэ.
Г.Бямбасүрэн