ОХУ-ын Ерөнхийлөгч Владимир Путин наймдугаар сарын 10-ны өдөр Крым болон Севастопольд зочилсонтой холбоотойгоор Украины Гадаад хэргийн яам эсэргүүцэл илэрхийлсэн тухай ням гаригт тус яамны албан ёсны цахим хуудас дээр мэдээлжээ.
“Энэ удаад болон өмнө нь ОХУ-ын албан тушаалтнууд Украины талаас зөвшөөрөл авалгүйгээр Украины түр хугацаанд эзлэгдсэн нутаг дэвсгэрт /Крым/ очсон нь Оросын тал манай улсын тусгаар тогтнол, нутаг дэвсгэрийн бүрэн бүтэн байдлыг бүдүүлгээр зөрчиж байгаа хэрэг” хэмээн эсэргүүцэлд өгүүлсэн байна.
Оросын Ерөнхийлөгч Путин ням гаригт”Шөнийн чононууд” мотоклубын зохион байгуулсан “Вавилоны сүүдэр” олон улсын байк-шоунд зочилсон нь ийнхүү Украины эсэргүүцэлтэй тулгарчээ.
Энд дуулгахад, 1954 он хүртэл Зөвлөлт Социалист Бүгд Найрамдах Холбоот Орос Улсын бүрэлдэхүүнд багтаж байсан Крым мужийг 1954 оны хоёрдугаар сарын 19-ний өдөр Зөвлөлт Социалист Бүгд Найрамдах Украин Улсын харьяанд шилжүүлсэн түүхтэй. Улмаар 2014 онд Украинд улс төрийн хямрал үүссэний дараа Крымийн хойгт олон нийтийн санал асуулга явагдаж, үүний дүнгээр Крымийн хойг ОХУ-ын бүрэлдэхүүнд нэгдэж, Бүгд Найрамдах Крым Улс болон холбооны хэмжээний Севастополь хот үүсэн юм.
Харин ийнхүү нэгдснийг олон улс хүлээн зөвшөөрдөггүй бөгөөд ОХУ-ыг Украины нутаг дэвсгэрийн бүрэн бүтэн байдалд халдсан, эзлэн түрэмгийлэгч гэж үзэх болсон бөгөөд энэ үйл явдалтай холбоотойгоор ОХУ-ын эсрэг эдийн засгийн олон хориг тавьсан нь өнөөдрийг хүртэл үйлчилж байгаа аж.
Г.Бямбасүрэн
Уншиж байна |