Ерөнхий сайд У.Хүрэлсүх Тост, Тосон бумбын ордтой холбоотой асуудлаар холбогдох албаны хүмүүстэй уулзалт хийж, үүрэг даалгавар өглөө. Уулзалтад Уул уурхайн сайд Д.Сумъяабазар, Байгаль орчин, аялал жуулчлалын сайд Н.Цэрэнбат, МХЕГ-ын дарга Н.Цагаанхүү, ЦЕГ-ын дарга С.Баатаржав, Тагнуулын ерөнхий газрын дарга Д.Гэрэл, Ашигт малтмал, газрын тосны газрын дарга Х.Хэрлэн болон албаны хүмүүс оролцов.

Ерөнхий сайд У.Хүрэлсүх “Сүүлийн үед уул уурхайн салбарт ажиллаж байгаа зарим нэг олигархиуд Монгол төрийн хуулийг ихээхэн зөрчиж байна. Уул, ус хилэгнүүлж, ард түмнийг уйлуулж байна. Гурван тэс сумын иргэд уйлаад ярьж байна. Тэд төрөөс юм гуйгаагүй. Зөвхөн газар нутгийнхаа онгон дагшин байдлыг авч үлдэх гэсэн ард түмний илэрхийлэл. Ард түмэн газраа ухуулахгүй гэж байхад яагаад энэ газрыг ухаад байгаа юм бэ. Энэ нь  анхнаасаа хууль зөрчиж олгогдсон гэж ойлгож байгаа. Ерөнхий сайдын хувьд энэ асуудлаар хоёр, гурван удаа та нар үүрэг даалгавар өгсөн.

Үүнтэй нэр холбогдоод байгаа УИХ-ын гишүүн Б.Чойжилсүрэн гэдэг нөхөрт би хэд хэдэн удаа анхааруулж хэлсэн. Яасан ханаж цаддаггүй шунал вэ. Эх орны газар сэндийчиж, хувьдаа ашиг олно гэж УИХ-ын гишүүнээр сонгогддоггүй байх гэж би бодож байна.

Албан тушаалтнуудыг авлигаддаг байсан бол одоо ард түмнийг авлигадах гэж оролддог болсон байна, энэ олигархиуд. Тагнуул, цагдаагийн дарга аа, уул уурхайн хэлэлцүүлэг дээр иргэн Нямдаваа “Уул уурхайг зогсоохын төлөө тэмцэхэд 3-5 сая төгрөгөөр амыг нь барих гэж оролдсон гэж улс орон даяар ярьж байна. Улаанбаатар хотод хэлэлцүүлэгт оролцохоор ирсэн 40 орчим хүнийг авлигадах гэж оролдсон” гэж ярьж байна. Нүдэн дээр авлига явж байхад яагаад шалгахгүй байна.  

"Сауд гоби"-гийн зөвшөөрөл хуурамчаар олгогдсон байна. Ард түмнийг авлигадах гээд оролцож байхад яагаад шалгахгүй байна, цагдаа, тагнуулын дарга аа, БОАЖ-ын сайд аа, УУХҮ-ийн сайд аа. Үүнийг  хэрэг үүсгэж шалга. 370 мянган тонн нүүрсний хулгайн хэрэг яасан бэ. Жилийн өмнө үүрэг өгсөн. Шалгаж байна л гээд байгаа. Үр дүн нь хаана байна вэ.

Шударга ёсыг тогтоож, энэ ашигт малтмалын лицензийг цуцлах ёстой. Тост, Тосон бумбын ордыг улсын хамгаалалтад авах ёстой. Байгаль орчны сайд аа. Та өнөөдөр шийдвэр гаргаад Ашигт малтмалын хэрэг эрхлэх газарт Тост, Тосон бумбын ордод үйл ажиллагаа явуулж байгаа компанийн лицензийг цуцал.

Тэнд аваачсан байгаа техник, хэрэгслийг нь журамла, цагдаагийн дарга аа. Та өөрөө газар дээр нь очиж ажилла. Ард түмэнд хээл хахууль өгөх гээд байгаа нөхдүүдэд хэрэг үүсгэж шалга.  Нөхөн сэргээлтийг нь хийлгэ. Энэ ажлыг хийж чадахгүй бол та нар ажлаа өг. Өвлийн тэсгим хүйтэнд 30-40 мянган хүн Сүхбаатарын талбайд жагссаныг та бүхэн битгий мартаарай. Хууль зөрчсөн "Сауд Гоби" компаний үйл ажиллагааг зогсоо.  Монголын хууль, хяналтын байгууллага шударгаар ажиллана гэдэгт итгэж байна" гэлээ.

Ийнхүү уулзалтаар  Ерөнхий сайд Тост, Тосон бумбын ордод үйл ажиллагаа явуулж буй "Сауд гоби" компанийн тусгай зөвшөөрлийг цуцлах үүргийг Уул уурхайн сайдад өгөв. Мөн тус ордод үйл ажиллагаа явуулахаар бэлдэж буй 3-4 компанийн тусгай зөвшөөрлийг ч цуцлаж, Тост, Тосон бумбыг бүхэлд нь улсын тусгай хэрэгцээнд авахыг даалгалаа. 

Н.Энх