2018 онд жороор олгодог Лоразепам эмийг 150 000 ширхэгийг тээвэрлэж яваад саатуулагдан баривчлагдсан Монголын дипломатуудын шүүх хурал болж байгаа талаар Bild сонин мэдээлжээ.
"2018 онд 53 настай Т.Мөнхбат, 38 настай жолооч Э.Оргил нарыг жороор олгодог, тайвшруулах үйлчилгээтэй Лоразепам эм 150 мянган ширхэгийг дипломат шуудан нэрийн дор тээвэрлэж байхад нь цагдаагийнхан саатуулсан. Энэ эмийн зах зээлийн үнэ нь 600 000 евро юм" хэмээн эх сурвалж мэдээлсэн байна.
Түүнчлэн "монголчуудыг хар тамхи импортлосон хэргээр шүүж" байгааг дамжуулжээ.
Шүүх хурлын үеэр атташе "Будапештийн консулын газраас авсан машинаар дипломат шууданг Берлинд хүргэж өгөх ёстой байсан. Дотор нь юу байгааг мэдээгүй" хэмээн мэдүлсэн байна.
Bild сонин цааш нь мэдээлэхдээ:
"Дипломат шуудан нэрийн дор хууль бус ажиллагаа ихээр явагддаг, 2019 оны зургаадугаар сард гэхэд л 70 кг героин тээвэрлэсэн Монголын өөр хоёр дипломат баривчлагдсан юм. Одоогоор дипломатуудын зөөж явсан эмийг шинжлэх ажил үргэлжилж байгаа бөгөөд дипломатуудыг хар тамхины хэргээр буруутгаж байна" гэжээ.
Г.Бямбасүрэн