Олон нийтийн сүлжээнд Босоо Хөх Монгол бүлгэм трансжендер иргэдийг айлган, дарамталсан, биеэ үнэлж байхад нь баривчилсан гэх зураг, мэдээллийг тараагаад байсан билээ. Үүнтэй холбогдуулан өнөөдөр (2019.09.10) иргэн Б.Солонго бэлгийн цөөнх тэр дундаа трансжендер хүмүүсийн амьдрал, эрх хамгааллын талаар мэдээлэл хийлээ.
Тэрбээр мэдээллийн эхэнд Босоо Хөх Монгол бүлгэмийн үйлдэлд чин сэтгэлээсээ харамсаж буйгаа илэрхийллээ. Б.Солонго “Миний өнгөрсөн 7-8 жилийн амьдралд нийгмийн ялгаварлан гадуурхалт өдөр тутам тулгарч байсан. Банк санхүү, эрүүл мэнд, хууль цагдаа, боловсрол, өдөр тутмын үйлчилгээний байгууллагууд ч ялгаварлан гадуурхдаг байсан. Харин 2019 оноос нийгмийн уур амьсгал харьцангуй өөр болсон. Гэвч нэг хүний оруулсан мэдээллээс болоод бэлгийн цөөнх тэр дундаа трансжендер бүх хүнийг хамруулан ярьж байгаа үйлдэлд харамсаж байна. Ингэж бэлгийн цөөнх тэр дундаа трансжендер хүмүүсийн нэр төр, амь насанд халдаж байгаа нь олон улсын гэрээ конвенци, Монгол Улсын хууль тогтоомжийг зөрчсөн үйлдэл гэж үзээд Хүний эрхийн үндэсний комисст хандсан юм билээ. Бид хэдийгээр трансжендер гэсэн нэр томъёотой боловч тус тусын зам мөрөөр амьдарч байгаа хүмүүс. Трансжендер хүмүүсийн төрийн болон төрийн бус байгууллагаар хамгаалуулах эрх зөрчигдсөөр байгаад эмзэглэж явдаг” хэмээн ярилаа.
Мөн тэрбээр трансжендер хүмүүс биеэ үнэлж байгаа нь нууц биш үнэн гэдгийг хэллээ. Гэхдээ биеэ үнэлж байгаа цөөн хүнээс болж бүх трансжендерүүдийг биеэ үнэлэгч гэж битгий бодооч. Өөрсдөө ажлын байр бий болгож, амьдарч байгаа хүмүүс байгаа гэдгийг нэмж хэлэв.
Б.Энэрэл
Уншиж байна |