Ерөнхий сайд У.Хүрэлсүх өнөөдөр (2019.09.13) шинээр баригдах соёл урлагийн байгууллагуудын зураг төсөлтэй танилцлаа. Энэ үеэр Ерөнхий сайд Монгол Улс сүүлийн 30 жил соёл урлагийн хөгжлийг орхигдуулсан гэдгийг хэллээ. Тиймээс Засгийн газар соёл урлагийн байгууллагуудыг шинэчлэх ажлыг эрчимтэй эхлүүлж буйгаа хэлэв.
Ерөнхий сайд У.Хүрэлсүх:
Бид сүүлийн 30 жил дандаа уул уурхай ярьсан. Яаж газар ухах уу, яаж алт олох уу гэж ярьсан. Энэ мэдээж ярих ёстой байх. Гэхдээ нэг зүйлийг орхигдуулсан. Тэр нь ард түмнийг соён гэгээрүүлэх соёл урлагийн ажлыг. Монголд гадаадынхан ирээд үзэж харах зүйл юу ч байхгүй. Цонжин болдогоос өөр юм байхгүй. 300, 400 км явж Хархорин орж, хуучны хот үзэж байгаа. Өөр үзэх юм байхгүй. Тиймээс Засгийн газар ард түмнээ соён гэгээрүүлэх, түүх дурсгалаа олон түмэнд таниулах ажилд ихээхэн анхаарал тавьж, эхний ээлжинд дөрвөн соёл урлагийн байгууллагыг шинээр байгуулж, ашиглалтад оруулна.
Бүх төсөл, макет нь хийгдсэн. 2020 оны төсөвт санхүүжилт нь сууна. Ирэх жилээс ажил нь эхэлж, 1-2 жилийн хугацаанд энэ барилгууд ашиглалтад ороод, үйл ажиллагаа нь эхэлнэ. Үүний дараа дахиад гурван байгууллагыг шинэчилнэ.
Энэ гурван барилгын зургийг хийх 1.2 тэрбум төгрөг гаргаж өгсөн. Гэхдээ энэ гурван барилгыг буулгана. Суурин дээр нь яг одоогийн дизайнаар барилгыг шинээр томруулж барина.
Мөн төв цэнгэлдэх хүрээлэн баригдана. Зураг төсөл нь хийгдэж байгаа. Тэр төв цэнгэлдэх хүрээлэн 30-40 мянган хүний суудалтай битүү байна. Одоо аж ахуйн нэгжүүдтэй хамтраад өвлийн спорт ордон барьж байгаа. Хөлбөмбөгийн талбай баригдаж байгаа. Мөн хөгжлийн бэрхшээлтэй иргэдэд зориулсан спортын ордон баригдана. Нэг ёсондоо Яармаг бүхэлдээ спортын район болно.
Ирэх 5-10 жилд баригдах байгууламжуудын бүх макетыг талбай дээр байрлуулж, ард түмэндээ харуулна гэсэн мэдээллийг хэвлэлийнхэнд өглөө.
Б.Энэрэл
Уншиж байна |