“Тавантолгой түлш” ХХК-ийн ажилтан Н.Цэрэндорж өнөөдөр /2019.09.13/ сэтгүүлчдэд мэдээлэл хийлээ. Тэрбээр тус компанийн үйлдвэрлэж буй сайжруулсан шахмал түлш нь зуух халаахгүй, илчгүй мэтээр тус компанийн ажилчдын хөдөлмөрийг үгүйсгэж буйд харамсаж буйгаа мэдэгдсэн юм.
Олон нийтийн цахим хуудсаар дамжуулан "Тавантолгойн түлш" ХХК-ийн үйлдвэрлэж буй сайжруулсан шахмал түлшийг түлж үзлээ. Мод шиг асч байгаа хэр нь илчгүй, тортог ихтэй байна гэх мэдээллийг цацсан. Уг мэдээллийг ТВ9 телевизийн "Монгол коммент" нэвтрүүлгээр мэдээлэл болгон цацсан нь байгууллага, бүтээгдэхүүний нэр хүндэд ноцтой халдсан үйлдэл гэж үзэж буйгаа тус компанийн ажилчид хэллээ. Иймд Зөрчлийн тухай хуулийн дагуу хуулийн байгууллагад хандах болсноо мэдэгдэв.
Зөрчлийн тухай хуулийн 6.21 дүгээр зүйл.Гүтгэх
1.Хүний нэр төр, алдар хүнд, хуулийн этгээдийн ажил хэргийн нэр хүндийг гутаан доромжилсон худал мэдээллийг нийтэд дэлгэсэн, эсхүл мэдээллийн хэрэгсэл, нийтийн сүлжээгээр тараасан бол хүнийг хоёр мянган нэгжтэй тэнцэх хэмжээний төгрөгөөр, хуулийн этгээдийг хорин мянган нэгжтэй тэнцэх хэмжээний төгрөгөөр торгоно.
“Тавантолгой түлш” ХХК-ийн ажилтан Н.Цэрэндорж "Манай нүүрсийг мод шиг асч байгаа хэр нь илчгүй" гэсэн байна. Мод шиг ассан хэр нь илч гарахгүй байна гэдэг ташаа мэдээлэл. Өөрөө түлж үзээгүй хэр нь санаанаасаа зохиомол зүйл бичсэн байна. Түүхий нүүрс асах гэж асар уддаг. Харин манай нүүрс технологийн дагуу боловсруулсан тул хурдан асч 10 минут орчим утаа гараад түүнээс хойш утаа гарахгүй" гэв.
Одоогийн байдлаар "Тавантолгой түлш" ХХК 200 гаруй мянган тонн нүүрс үйлдвэрлэн нөөцлөөд байгаа гэнэ.
Г.Сүрэн
Уншиж байна |