Туркмений Ерөнхийлөгч Гурбангулы Бердымухамедовын “Туркменский алабай” нэртэй нохойны тухай шинэ ном хэвлэгдэн гарсныг тохиолдуулсан ёслолын арга хэмжээ зургаа дахь өдрөө үргэлжилж байгаа талаар “Хроника Туркменистана” мэдээллээ.
Туркмений Ерөнхийлөгч есдүгээр 13-ны өдөр Сайд нарын танхимын хурал дээр шинэ номоо танилцуулан, сайд нарт бэлэглэсний дээр Туркмений хоньч нохойны тухай өөрийн зохиосон шүлгийг уншиж өгчээ.
Харин есдүгээр сарын 14-ний өдөр төрийн тэргүүний шинэ ном хэвлэгдсэнд зориулагдсан ёслолын ажиллагаа Соёлын ордонд эхлэсэн байна. Ёслолын арга хэмжээний үеэр ерөнхийлөгч шүлгийг нь бичсэн “Туркменский алабай” дуу анх удаа үзэгчдийн хүртээл болсон гэнэ.
Улмаар есдүгээр сарын 16-ны өдөр Олон нийтийн байгууллагуудын төвийн хурлын танхимд шинэ номын танилцуулга болсон бөгөөд энэ танилцуулгада Парламент, яам, албан байгууллагууд, олон нийтийн байгууллагууд, намуудын төлөөлөгчид, эрдэмтэд болон хэвлэл мэдээллийнхэн оролцсон байна.
Мөн энэ өдөр Гадаад хэргийн яамны Олон улсын харилцааны хүрээлэнд Ерөнхийлөгчийн номын нээлт болжээ. Улмаар есдүгээр сарын 17, 18, 19-ний өдрүүдэд мөн л засгийн газрын гишүүд, газар тариалангийн салбарын удирдлага, төлөөлөгчид, салбарын байгууллагууд, байгаль орчныхон болон салбарын шинжлэх ухааны хүрээлэн, боловсролын байгууллагуудын төлөөлөгчдийг оролцуулсан шинэ номын нээлт болжээ.
Г.Бямбасүрэн