Чөлөөт бөхийн ДАШТ-ий эмэгтэйчүүдийн 68 кг-ийн жинд “Лондон-2012” олимпийн наадмын хүрэл, ДАШТ-ий хошой алт, мөнгөн медальт, Монгол Улсын хөдөлмөрийн баатар гавьяат тамирчин Соронзонболдын Батцэцэг Нур-Султаны дэвжээнээс манайхны гурав дахь хүрэл медалийн эзэн боллоо.

С.Батцэцэг баатар маань манай чөлөөт бөхийнхнөөс Дэлхийн аварга шалгаруулах тэмцээнээс алт, мөнгө, хүрэл медаль хүртсэн анхны, дөрвөн медаль (нөгөө нь гавьят тамирчин О.Насанбураа) хүртсэн хоёр дахь тамирчин болж байна.

Дэлхийн дэвжээнд долоо дахь удаагаа зодоглосон тэрбээр эхний даваанд Узбекистаны Нулифар Гадаеваг цэвэр, 1/8 шигшээд ДАШТ-ий хошой хүрэл медальт, Европийн дөрвөн удаагийн аварга Латвийн Анастасия Григорьеваг 6:0-ээр тус тус ялсан. Харин шөвгийн наймд дэлхийн болон Европийн аварга Шведийн Женни Франссонд цаг дуусахтай зэрэгцэн 5:6-гаар харамсалтай ялагдсан билээ.

Тэгвэл дагах барилдаанд ДАШТ-ий мөнгө, хүрэл медальт Францын Кумба Ларрокийг оноогоор цэвэр (12:2) ялснаар Токиогийн олимпийн наадмын эрхээ авсан. Хүрэл медалийн төлөөх барилдаанд ДАШТ-ий алт, хүрэл медальт Украины Алла Черкасоваг 2:2 буюу сүүлчийн оноогоор яллаа. С.Батцэцэг 2015 онд Лас-Вегаст дэлхийн хошой аварга цол хүртсэнээс хойш гэмтэл бэртэл, хувийн амьдрал, жин өгссөн зэргээр төдийлөн том амжилт гаргахгүй байжээ.

Ц.Ганбат