УАА гараад удаагүй байхад УАЕ-г гаргалаа. Үүний цаана асар “том” бизнес явагдаад байна гэх хардлага нийгэмд түгээд байна. Тэгвэл үнэн хэрэгтээ ашигтай бизнест амташсан зүйл үгүй. Харин хил, гаалиар орж ирэх автомашины тоо зах хязгааргүй олширч дөнгөж шинээр гаргасан УАА дугаар дуусчээ. Тэгсэн ч “дугаар алга” гээд сууж байх боломжгүй тул УАЕ-г гаргасан гэдгийг албаны хүн тайлбарлалаа. Гэхдээ энэ нь огт шинэ зүйл биш зөвхөн үсгийг нь сольсон төдий, цаашид ч УА серийн арын үсэг солигдоод явах аж.

Нэг өдрийн дотор багадаа 200, ихдээ 500 автомашиныг улсын бүртгэлд шинээр бүртгэж дугаар олгодог байна. Өнөөдрийн байдлаар нийтдээ 1,024,417 тээврийн хэрэгсэл улсын бүртгэлд бүртгэлтэй байдаг. Харин он гарснаас хойш есөн сарын хугацаанд /2019.09.24-ны байдлаар/ импортоор орж ирж, шинээр улсад бүртгэгдсэн автомашины тоо 76,539-д хүрчээ. Ердөө зургаан сарын хугацаанд 76 мянган автомашин улсад шинээр нэмэгдсэн гэхээр түгжрэлд хэн ч буруугүй. Машин оруулж ирсээр байгаа монголчууд бид өөрсдөө л буруутай аж.  

76 мянгаас УАА дугаарыг нийслэлийн болон орон нутгийн 9890 автомашинд, УАЕ дугаарыг одоогоор 130 тээврийн хэрэгсэлд шинээр олгожээ.

Тэгэхээр улсын дугаар олгох ажлыг гүйцэтгэгч АТҮТ-ийнхны хувьд давхардуулахгүйгээр дугаар зохионо гэдэг ёстой “алаан” гэнэ. Өмнөх үсгийг нь давхардуулахгүй байхаар УАА-г бодож олсон ч дууссан тул арын үсгийг нь сольж УАЕ-г олгох ажлыг эхлүүлсэн гэдгийг учирлав.

Тэгвэл УАА, УАЕ дугаар энгэрт хадсан үнэтэй. Тиймээс ч “баячууд” л бандгар жийп машиндаа авч зүүдэг гэх яриа газар авч үүнтэй өрсөн “Приусэнд наачихаж ээ нөгөөхөө” гэх ёгөөдөл ч цахимаар харагдах болов.

Автомашины улсын дугаарын үсэг солих эрх бүхий байгууллага нь Зам тээврийн яам. Харин үүнийг нь жолооч нарт олгох асуудлыг Автотээврийн үндэсний төв хариуцдаг. Тус төвийн бүртгэлийн программ нээлттэй буюу цахимд шилжсэн тул хэн дуртай хүн нь аль таалагдсан, хүссэн дугаараа burtgel.transdep.mn цахим хуудсанд нэвтрэн шүүж, хайж байгаад авах боломжтой юм байна.

УАА, УАЕ ч тэр бүх улсын дугаар адил үнэ ханштай буюу 7600 төгрөгийн хураамжтай аж. Тодруулбал

•           Тээврийн хэрэгслийн гэрчилгээний үнэ-500

•           Улсын тэмдэгтийн хураамж-3600

•           Үйлчилгээний хураамж /АТҮТ/-3000

•           Банкны шимтгэл-500

Эдгээр хураамжийг төлөөд цахим хуудсаар нэвтрэн хүссэн дугаараа хэн ч авч болох гэнэ. Өөрөөр хэлбэл долоон буудлын Должин эмээ 7600 төгрөгөөр УАЕ9999 дугаарыг авч болох юм байна.

Г.Сүрэн