Уг хэрэг шүүхэд шилжсэний дараа НИТХ-ын төлөөлөгч Ц.Сандуй “Цензургүй яриа” нэвтрүүлэгт оролцож, 60 тэрбумын схемд МАН-ын өнөөгийн дарга нар, Засгийн газрын сайд нар холбоотой гэсэн мэдээллийг өгсөн. Тэрбээр Ерөнхий сайд У.Хүрэлсүх, ЗГХЭГ-ын дарга Л.Оюун-Эрдэнэ, МАН-ын Ерөнхий нарийн бичгийн дарга Д.Амарбаясгалан нар сонгуулийн үеэр 60 тэрбумын схемийг үзэж, “маш сайн төлөвлөгөө” хэмээн сайшааж байсан хэмээн тухайн нэвтрүүлэгт оролцохдоо ярьсан.
Үүнд ЗГХЭГ-ын дарга Л.Оюун-Эрдэнэ өнөөдөр тайлбар хийлээ. Тэрбээр “Энэ хэрэг шүүх рүү очих үед Ц.Сандуй мэдэгдэл хийсэн нь надад сонирхолтой санагдаж байгаа. Өмнө нь ярьж болох зөндөө хугацаа байсан ч огт байр суурь илэрхийлээгүй байж шүүх хурлын өмнө ярьсан нь хардлага төрүүлсэн. Нэг үгээр хэлбэл энэ хэрэг замхрах шат руугаа явж байгаа юм биш биз гэж бодогдсон. Үүнийг дахиад нягталж харах ёстой байх.
Эцэстээ М.Энхболд гэх хүн огт байгаагүй болж хувирсан. Тэгээд 60 тэрбумыг зохион байгуулсан хүн нь Л.Оюун-Эрдэнэ, У.Хүрэлсүх бас байсан гэж ярьсан. Эндээс улс төрийн ямар нэг тохироо явагдаж байна уу гэсэн хардлага төрснөө нуугаад яахав” гэсэн байр суурийг илэрхийллээ.
Б.Энэрэл