УИХ-ын чуулганы нэгдсэн хуралдаанаар Үндсэн хуульд нэмэлт өөрчлөлт оруулах асуудлаар Ард нийтийн санал асуулга явуулах УИХ-ын тогтоолыг хүлээж авах асуудлыг хэлэлцэж байгаа. Ерөнхийлөгчийн тавьсан хоригийг хэлэлцэх үед төрийн тэргүүн чуулганы хуралдаанд байлцсангүй. Хуулиараа Ерөнхийлөгч чуулганы хуралдаанд тааллаараа оролцох эрхтэй. Хэлэлцэж байгаа асуудалтай холбогдуулан гишүүд байр сууриа илэрхийлж байгаа юм. Тухайлбал, УИХ-ын гишүүн С.Жавхлан:
-Миний хувьд хоригийг дэмжиж байгаа юм. Цаг үе нь болоогүй байна. Өвөлжилтийн бэлтгэл, тариа ногоо, хүүхдийн ханиад томуу, утаа гээд асар их зүйл хөвөрнө. Гэтэл энэ цагаар санал асуулга явуулах нь ирц хүрэхгүй, гаргалгаагүй болох юм. Зөв мэдрэмжтэй цагтаа асууж болно. Санал асуулгыг огт асууж болохгүй гэдэг үйл алга байна. Ерөнхийлөгчийн хоригийг нь хэлэлцэх байхад Ерөнхийлөгч хаачсан бэ. Өөрөө ирж ажлаа хийгээч ээ. Бие оторлоод байгаа юм уу. Уг нь намрын чуулганы нээлт дээр, өнөөдөр ирээд байх хэрэгтэй. Эсвэл Ерөнхийлөгчийн засаглалыг хэлэлцэх боломжгүй гээд хориг тавьж байгаа юм уу. Араас нь УИХ тарна гээд зөндөө ярьсан. Ийм зүйл дээр эв нэгдлийн бэлгэ тэмдэг гэдэг утгаараа ирээд, бүх зүйлээ тайлбарлаад, гарц гаргалгааг нь гаргах хэрэгтэй. Тэгээд урьдаа шатрын хүү тавьж байгаа юм шиг өмнөө Тамгын газрын даргаа ирүүлдэг. Нэртэйгээр нь Тамгын газрын даргадаа ажлаа өгчихмөөр юм хэмээлээ.