Юугаа мунхаглаад байгаа юм бэ?! Үнэгүй юм гэж хаана ч байхгүй. Өмнө нь төлсөн эсвэл хэзээ нэг өдөр төлөх зүйл л "үнэгүй" байдаг.

Өнгөрсөн амралтын өдөр МАХН-ынхан “Өрх бүрт орон сууц” үндэсний хөтөлбөрөө эхлүүлсэн гэнэ. Өчнөөн иргэдийг өдөржин намын байрныхаа гадаа очерлуулав. Дүүрэг дүүргээр нь өнөөдөр бүртгэж, маргааш үнэгүй орон сууцтай болгох бололтой. Ямар гээчийн увайгүй үйлдэл вэ. Хүний байхгүй зүйл дээр дөрөөлөхийг басамжлал гээд нэрлэхэд буруудахгүй биз.

Улаанбаатарынхан орон сууцтай болох мөрөөдөлтэй нь үнэн. Ганц өрөө байртай болохын төлөө банкны зээлийг хэдэн арван жилээр төлж, шар махтайгаа хатаж яваа нь худлаа биш. Ядаж л утаагүй гэж түлсэн түлш нь угаартаж үхэхэд хүргээд байгаа учраас яаж ийж байгаа тэр гэр хорооллоос холдохын хүслэн болж байгаа нь буруу биш. Тэглээ гээд хүний зовлонт хэрэгцээ дээр дөрөөлөн шоудах нь байж болох зүйл үү?!

МАХН-ын гүйцэтгэх товчооны гишүүн З.Баянсэлэнгэ “Би барилга хот байгуулалтын сайд байхдаа энэ ажлыг явуулж байсан. Төр бүх нийтийг орон сууцжуулах боломжтой. Гэтэл төр ажлаа хийхгүй байна. МАХН энэ ажлыг олон жил судалж хэрэгжих боломжтой гэж үзсэн учраас энэхүү хөтөлбөрийн нээлтийг хийж байна” гэж тархи угаажээ. Тэгвэл З.Баянсэлэнгэ Барилга хот байгуулалтын яамыг удирдаж, төрийн сайдын эрх мэдэлтэй байхдаа энэ ажлыг хийхгүй яасан юм бэ. Түүнд эрх мэдэл, албан тушаал байсан. Харин тэр эрх мэдлээ ашиглан гэр бүлээ орон сууцжуулсан асуудал нь өнөө ч шүүх дээр яваа. Гэтэл өнөөдөр гудамжнаас юу хийж гийгүүлэх гээд байгаа юм бэ?

Н.Энхбаяр ч ялгаагүй, түүнд монгол төрийн тэргүүний эрх мэдэл байсан. Ерөнхийлөгчөөр ажилласан он жилүүддээ хийж хэрэгжүүлээгүй ажлаа өнөөдөр хийх үү. Эрх мэдэл, албан тушаалтай байхдаа хийгээгүй атлаа одоо хэнийг хуурах гэж ингэж муйхраар улайрна вэ? Яагаад ийм ичих нүүргүй, ханаж цадах сэтгэлгүй юм бэ?

Муйхарлаж, мунхаглаж, улайрч, хуурч байгаад монгол гарлаа, бусдаас юугаараа ялгаатай юм бэ?! Ялгаагүй, увайгүй улстөржихөөс өөр юу ч хийхгүйг чинь монголчууд хангалттай харсан, та нар Монголын улс төрд шинэ хүн биш. Өнөөдөр амаа олохгүй муулж байгаа МАН, АН-тайгаа ав адилхан гэдгээ ухаар. Айл бүрийг орон сууцжуулна гэж уран донгодоод ч тэднээс ялгарах зүйл МАХН-ын удирдлагуудад үгүй. Тиймээс байхгүйн зовлонтой иргэдээр наадаж, басамжлах хэрэггүй. Хэн нь хэн бэ гэдгийг хэлээд өгнө, ирэх сонгууль та нарт.

Б.Энэрэл