ОХУ-ын Саратов хотод есөн настай сурагч охин сургуульдаа хүрэх замдаа амь насаа алдсан хэрэг Орос даяар шуугиан тарьсны дээр, энэ эмгэнэлт хэргээс сургамж авсан иргэд орон нутгийн захиргаанаас сургууль хүртэлх замыг аюулгүй болгохыг шаардан нэгдэж эхэлжээ.
Тодруулбал, Оросын "ВКонтакте" олон нийтийн сүлжээнд #ДойтиДоШколы /сургуульруугаа хүрэх/ нэртэй уриалга гаргасан бөгөөд энэ уриалгад Воронеж, Красноярск, Санкт-Петербург, Екатеринбург, Казань, Челябинск зэрэг Оросын 14 хот нэгдсэн байна. Уриалгад нэгдсэн хүн бүр олон нийтийн сүлжээнд хүүхдүүд сургуульруугаа явах аюултай замын талаар мэдээлж, зургийг нь хавсаргахыг зөвлөжээ. Аюултай газар бүр дээр орон нутгийн захиргаанаас бодитой арга хэмжээ авахыг иргэдийн зүгээс шаардах юм байна.
Сурагчдыг золгүй явдлаас хамгаалах зорилготой энэхүү хөдөлгөөнд өдөр ирэх тусам хүмүүс олноор нэгдэж байгааг "Лайф" мэдээлжээ.
Энд дуулгахад, 10 дугаар сарын 09-ний өдөр Саратов хотод есөн настай Лиза гэх охин сургуульдаа хүрэх замдаа ор сураггүй алга болсон байна. Охиныг хайхаар олон мянган оршин суугч нэгдэн, өдөр шөнөгүй хайсан ч 10 дугаар сарын 11-нд гаражаас охины цогцосыг олжээ. Удалгүй охиныг хөнөөсөн хэрэгт сэжиглэн 35 настай эрийг баривчилсан бөгөөд тэрбээр өмнө нь хүчин, бага насны хүүхдийг хүчирхийлсэн, хулгайн хэргээр ял шийтгэл эдлэж байсан гэнэ.
Г.Бямбасүрэн
Уншиж байна |