УИХ-ын чуулганы нэгдсэн хуралдаанаар Гэрч хохирогчийг хамгаалах хуулийн төслийг хэлэлцэх эсэхийг шийдлээ. Уг хуулийн төсөлд Тахарын албаны тухай хууль хүчингүй болсноор шүүн таслах ажиллагааны хэвийн нөхцөлийг бүрдүүлэх зорилгоор шүүх, шүүгчийн аюулгүй байдлыг хангах, гэрч, хохирогчийг хамгаалах, яллагдагч, ялтныг хуяглан хүргэх, хуяглан харгалзах, оргон зайлсан яллагдагч, ялтныг эрэн сурвалжлах чиг үүргийг цагдаагийн байгууллага гүйцэтгэх болсныг УИХ-ын гишүүн Ч.Хүрэлбаатар танилцуулгадаа дурдлаа. Хэлэлцэж байгаа асуудалтай холбогдуулан УИХ-ын гишүүн О.Баасанхүү:
-Хорих байгууллагад ял эдэлж байгаа Ц.Амгаланбаатар, Б.Содномдаржаа, Т.Чимгээ гэсэн хэдэн нөхөд байна. УИХ-ын гишүүд нь ОУПХ-ны хуралд очоод бретви өгсөн, будаг өгсөн, Монголын төр тэдний амийг нь хорлох гээд байна гэж ярьж байна. . Шүүхийн шийдвэр гүйцэтгэх байгууллага бол ХЗДХЯ-ны харьяа. Хорих байгууллагад ийм үйлдэл гарч байгаад хэн хариуцах юм бэ. Олон улсын байгууллага дээр ийм зүйл яригдаж байгааг би гайхаж байна. Хоёрдугаарт, Б.Содномдаржаа, Ц.Амгаланбаатар, Т.Чимгээ нарыг эрүүдсэн шүүсэн гэдэг. Тэд ялтан бол эмнэлэгт хэдэн сар болж байгааг нь хүмүүс гайхаж байна. Орон дээр нь тарвалзаж, тансаглаад эмнэлгийн хүмүүсийг тайван амьдруулахгүй, байн байн сайд нь очиж эргэж тойрч гүйгээд биднийг бас дэглэчих юм гээд үйлчлүүлэгчид гомдол мэдүүлсэн байна.
Энэ хуулийг баталснаар тэднийг тусад нь өрөөнд байлгах юм уу эсвэл эмнэгт хамгаалдаг өрөө гаргах юм уу. Эмнэлэгт өвчтөнүүд үзүүлдэг болохоос биш ялтай хүмүүс олон сар хэвтэхгүй. Хэнд нь ингэж онцгойлон анхаараад байгаа юм бэ. Хэн амийг нь хорлох гээд байгаа юм, нэрийг нь одоо шууд хэл. Хэн аминд нь хүрэх гээд байгаа юм. УИХ-ын гишүүд хэлсэн үгэндээ хариуцлагагүй хүлээдэггүй гэж байгаа боловч бодитой гэмт хэргийн тухай мэдээлэл яриад байна. Тэднийг амиа хорло гэж бретви өгсөн гээд ОУПХ-дээр Монгол Улсыг гутаан доромжилж ярьсан гишүүнийг нөгөө цаад байгууллага нь “Та нар битгий ОУ-ын байгууллагын нэрийг барьж, улс төр хийгээд бай” гэж яриад шившиг болоод сууж байна. Хоригдож байгаа хүн шоронд үхэж болдог. ШИНЭ намын хоёр галзуу Ж.Батзандан, Л.Болд хоёр яриад яваад байсан. Энэ хуулийг хэлэлцэж байгаа нь хүүхдүүдэд хамааралтай юу, хоригдож байгаа хүмүүсийг хамгаалах гээд байна уу?
ХЗДХ-ийн сайд Ц.Нямдорж:
-Ж.Батзандан, Л.Болд нарын хэлсэн үгийн талаар өөрсдөөс нь асууна биз. Ер нь бол Б.Содномдаржаа, Ц.Амгаланбаатар, Т.Чимгээ нарыг яргалсан, эрүүдэн шүүсэн нь үнэн. Бретви, будаг оруулж ирсэн гэдэг. . Энэ нь баримт, бичлэгтэй. Би байнга энэ талаар ярьж байгаа. Сүүлийн 70 жил Монголд гарч байгаагүй яргалал тэнд болсон. Би ингэж яриад гурван жил болж байгаа. Харамсалтай нь тэднийг суллахгүй байсаар өнөөг хүрлээ. Би дахин энэ хүмүүсийн асуудлыг тавих гэж байна. Хилсээр шийтгүүлсэн хүмүүс шоронд ял эдэлж байгаа. Шоронгийн эмнэлэг шоронтой ижилхэн шүү дээ. Өмгөөлөгч байсан О.Баасанхүү мэдэх байлгүй дээ. Би нэг л удаа тус бүртэй нь уулзсан. Яргалалсан бичлэг гарахаас өмнө би очиж уулзсан. Дөрвөн жил тус бүрийг нь ганцаар нь болжмор шиг торон дотор хорьж, өдөрт гурван удаа тавагтай хоол шиддэг. Өглөө 06 цагаас эхлэн шөнийн 12 цаг хүртэл хагас сууж ийм байдалтай дөрвөн жил явсан. Ядарсан хохирсон иргэдийг тарвалзаж байгаа гэж ярьдагаа болих хэрэгтэй. Өнөөдөр шүүхийн шийдвэрээ өөрчилж өгөхгүй байгаа учраас энэ хүмүүс ял эдэлж байна. Хэрвээ би Ерөнхий шүүгч, ерөнхий прокурор байсан бол яргалсан асуудал гарч ирсэн даруйд нь хэргийг дээд шүүхээр оруулж шүүхийн тогтоолыг нь хүчингүй болгож мөрдөн байцаалтад шилжүүлэх байсан. Үүнийг ОУПХ дүгнэлтдээ бичсэн байна лээ. Хүний эрхийн асуудлаар удаа дараа ярьж байхад УИХ-ын гишүүд нь яргалсан хүмүүсийг өмөөрөөд байгааг гайхаж байна.
Ийнхүү асуулт тавьж, хариулт авсны дараагаар Гэрч хохирогчийг хамгаалах хуулийн төслийг хэлэлцэхийг дэмжиж, анхны хэлэлцүүлэгт бэлтгүүлэхээр холбогдох байнгын хороонд шилжүүлэв.
Н.Энх