Монгол улсын Үндсэн хуулийн цэцийн дарга Өмнөд Солонгосын иргэнд бэлгийн дарамт учруулсан хэргээр цагдаагийнханд баривчлагдсан ч халдашгүй эрхтэй гэдэг үндэслэлээр суллагдсан талаар news.chosun.com мэдээллээ.
Эх сурвалжийн мэдээлснээр, Монгол улсын Үндсэн хуулийн цэцийн дарга Доржийн Одбаяр олон нийтийн газарт бусдын биед халдсан хэргээр баривчлагдсан байна.
Тодруулбал, тэрбээр Улаанбаатараас Инчоны нисэх буудал руу нислэг үйлдэж явсан Korean Air онгоцны үйлчлэгч, 20 настай эмэгтэйн өгзгөнд нь хүрсэн гэнэ.
Кorean Air компанийнхан Д.Одбаярын үйлдлийн талаар цагдаагийнханд мэдэгдэж, улмаар онгоц Инчоны нисэх буудлын хоёрдугаар терминал дээр газардах үед Д.Одбаярыг баривчилжээ.
Харин Өмнөд Солонгос дахь Монгол улсын Элчин сайдын яам дипломатуудын халдашгүй эрхийн талаарх “Дипломат харилцааны тухай конвенц”-ийн дагуу Д.Одбаярыг баривчлах ёсгүй гэж мэдэгдсэн бөгөөд улмаар түүнийг суллажээ.
Эх сурвалжийн мэдээлснээр, Д.Одбаярыг конвенцийн дагуу халдашгүй эрхтэй эсэхийг цагдаагийнхан шалгаад, дахин дуудаж байцаалт авах гэнэ.
Г.Бямбасүрэн