Дэлхий дахины терроризмтэй тэмцэх асуудлын талаарх АНУ-ын Төрийн департаментын илтгэлд БНАСАУ-ыг алан хядах үйл ажиллагааг ивээн тэтгэгч орон гэж хэвээр үлдээсэн нь улс төрийн өдөөн хатгалга гэж БНАСАУ-ын Гадаад хэргийн яам мэдэгджээ.

Энэ талаар Солонгосын цахим мэдээллийн төв агентлаг мэдээлсэн байна. 

"Худал хуурмагаар дүүрсэн АНУ-ын илтгэлийг БНАСАУ-ын ГХЯ  манай орны эсрэг улс төрийн өдөөн хатгалга гэж үзэхийн дээр энэ илтгэлийг бүрэн няцааж байна. Энэ нь АНУ манай улсын эсрэг дайсагнасан бодлого явуулсаар байгааг дахин баталлаа" хэмээн ГХЯ-ны мэдэгдэлд онцолжээ.

 

"Солонгос-Америкийн яриа хэлэлцээр мухардсан байгаа энэ нөхцөлд АНУ БНАСАУ-ыг терроризмыг санхүүжүүлэгч гэж харагдуулахаар улайрч байгаа нь хэлэлцээрийн түншээ доромжилсон, итгэл эвдсэн үйлдэл" гэж БНАСАУ-ын ГХЯ үзэж байгаагаа илэрхийлсэн байна.

Мөн ийм нөхцлөөс болж "Солонгос-Америкийн хэлэлцээрийн боломж хумигдаж байна" гэж онцолжээ.

Энд дуулгахад, АНУ-ын Төрийн департамент терроризмтэй тэмцэх асуудлаар жил бүр гаргадаг илтгэлийнхээ энэ жилийн дугаарыг өнгөрсөн долоо хоногт гаргасан юм. Илтгэлд БНАСАУ-ыг терроризмыг санхүүжүүлэгч орнуудын тоонд дахин оруулсан нь ийнхүү БНАСАУ-ын зүгээс шүүмжлэлтэй тулгарчээ.

Г.Бямбасүрэн