12:50 цаг:

УИХ-ын чуулганы нэгдсэн хуралдаанаар Өргөн нэвтрүүлгийн тухай хуулийн төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийлээ. Хэлэлцэж байгаа асуудалтай холбогдуулан гишүүд асуулт тавьж, хариулт авав. Гишүүд энэ хуулийн төсөл батлагдсанаар телевизүүдийн эздийг зарлах эсэх, хүний нэр төрд халдсан бол ямар арга хэмжээ авах талаар асууж, тодруулж байв. Хэн нэгнийг гүтгэж, гүжирдсэн мэдээлэл гаргавал тухайн редакцийн эрхийг цуцлах хүртэл арга хэмжээ авах заалт уг хуулийн төсөлд тусгагджээ.

Ийнхүү гишүүд асуулт асууж хариулт авсны дараагаар Өргөн нэвтрүүлийн тухай хуулийн төслийг эцсийн хэлэлцүүлэгт бэлтгүүлэхээр холбогдох байнгын хороонд шилжүүлэв.

 Хэрэглэгчдэд үнийн дарамт ирэхгүй

12:20 цаг:

УИХ-ын чуулганы нэгдсэн хуралдаанаар Өргөн нэвтрүүлгийн тухай хуулийн төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийж  байна. Хэлэлцэж байгаа асуудалтай холбогдуулан гишүүд асуулт тавьж, хариулт авав.

УИХ-ын гишүүн Х.Нямбаатар:

Хэрэглэгч дээр ямар нэг үнийн дарамт очих уу? Төрөөс нэмэлт санхүүжилт гаргах уу? Контентуудыг яах вэ?

УИХ-ын гишүүн Д.Тогтохсүрэн:

-Өргөн нэвтрүүлгийн хууль батлагдсанаар хэрэглэгчдэд үнийн ямар нэг дарамт ирэхгүй. Хэрвээ сан байгуулагдвал контентийг төр дэмжинэ.

УИХ-ын гишүүн Ж.Батзандан:

-Контент бэлтгэж байгаа хэвлэл мэдээллийн байгууллагуудад орлогоос нь хуваарилж өгнө гэж ойлгосон. Гэхдээ олон суваг дамжуулах дөрвөн компанийн хооронд маргаантай, үл ойлголцох олон асуудал байгаа гэж харж байна. Үл ойлголцох зүйл арилсан уу?

УИХ-ын гишүүн Д.Тогтохсүрэн:

-Энэ хуулиар холбогдох байгууллагын харилцааг зохицуулж байгаа. Үндэсний танин мэдэхүй, хүүхдэд чиглэсэн контентууд байна. Үл ойлголцол арилсан. Үзэгчдийг чанартай контентоор хангах чиглэлд энэ хууль чиглэгдсэн.

Төрийн байгуулалтын байнгын хорооны дарга С.Бямбацогт:

-"Монгол контент"-ийг дэмжих асуудал хөтөлбөрт тусгасан. Монгол Улсын нутаг дэвсгэрт 80 гаруй телевизүүд үйл ажиллага явуулж байна. Монгол бүтээлүүдийг дэмжих зорилготой.

Ийнхүү чуулганы хуралдаан үргэлжилж байна.

Н.Энх