Оны өмнөхөн Хятадын эрх баригчид ДЭМБ-д мэдээлж, он гарсны дараахан шинэ төрлийн титэм вирусийн талаарх мэдээлэл олон улсын хэвлэлүүдийн гол сэдэв болов.
2019-nCoV гэж нэрлэгдсэн шинэ төрлийн титэм вирус хурдацтай тархан, 2700 гаруй хүн халдвар авч, 80 хүн нас барж, дэлхийн бусад оронд ч бүртгэгдэх болсон. Энэ талаар дэлхийн тэргүүлэгч хэвлэл мэдээллүүд цаг мөч алдалгүй мэдээллэн, өвчний тархалтын явц, эмчилгээний явцад гарч буй ололтуудын талаар ч мэдээлсээр байгаа. Гэтэл үүний зэрэгцээ хуурамч мэдээллүүдийг санаатай болон санамсаргүйгээр тараах явдал улам бүр нэмэгдсээр байгаа юм.
Хятадын Ухань хотод байгаа хүмүүс өөрсдөө инстаграм, бусад сүлжээгээр дамжуулан үнэн зөв мэдээллийг өгсөөр байтал гагцхүү "аймшгийн киноны зохиол" мэт мэдээллүүд, дүрс бичлэг, гэрэл зургууд тархсаар байгаагийн дээр эдгээр нь одоогоор батлагдах боломжгүй байна.
Титэм вирусийн талаар гарч буй хуурамч мэдээллүүдийн дийлэнх нь гадаад эх сурвалжтай. БНХАУ халдварын тархалтыг нэмэгдүүлэхгүй, эмчилгээг үр дүнтэй байлгах, шинэ вакцин бүтээхийн тулд эрчимтэй ажиллаж байгааг мэдээлсээр байхад олон нийтийг төөрөгдүүлж буй мэдээллийг жагсаавал:
1. Lead Stories, Hal Turner Show гэсэн сайтуудаас эхтэйгээр Livejounal.com гэх блог нийтэлдэг платформ дээр орсон мэдээллийг Монголын хэд хэдэн хэвлэл орчуулан нийтлэв. 23 сая хүн хорионд орж, 112 мянган хүн амиа алдсан гэх энэ мэдээлэл мэдээж батлагдаагүй, эх сурвалж нь эргэлзээтэй.
2.Гудамжинд хүмүүс шууд унаж, нас барж байгаа талаарх мэдээлэл мөн л батлагдаагүй.
3. Мөн л шар хэвлэлүүд "Титэм вирусийн үүсвэр нь сарьсан багваахайнаас үүдэлтэй" гэх мэдээлэл орчуулан гаргах болсон. Ухань дахь далайн бүтээгдэхүүний захаас вирус анх тархсан бөгөөд сарьсан багваахайтай холбоотой гэсэн ямар ч баталгаа байхгүй.
4."Дарханд коронавирусээс болж хүн үхсэн" гэх харилцан яриа бүхий фейсбүүк мессенжерийн зураг сүүлийн хоёр хоногт эрчимтэй тархав. Мэдээж энэ бол ХУДАЛ.
5.Хүүхдүүд нь титэм вирусийн сэжигтэй нь нисэх буудал дээр илэрсний улмаас эцэг эх нь хүүхдүүдээ буудал дээр орхиод цааш ниссэн гэх мэдээллийн анхдагч нь 9Gad веб сайт. Энэ мэдээллийг албан эх сурвалжууд болон үнэн бодит мэдээлэл түгээдэг нэг ч агентлаг батлаагүй.
Бодит байдал ямар байгаа вэ?
Нөхцөл байдал газар дээрээ ямар байгаа талаар Хятадын олон нийтийн сүлжээний хэрэглэгчдийн нийтлэлийг уншихын зэрэгцээ Хятадын Ухань хотод амьдардаг, Twins_inchina нэрээр инстаграм хөтөлдөг орос эмэгтэйтэй холбогдов.
Тэрбээр
"Танайд тахал гарчихаад байхад яаж баярлаж чадаж байна аа гэдэг. Хүмүүс хэтэрхий их цочирдож, дэмий цуурхалд автчихсан. Бид яах байсан юм хөнжилдөө шигдээд хэвтэх байсан уу? Айсан зүйл нь өөр дээр нь ирдэг гэдэг. Бидний тархи айж байгаа зүйлийг илүүтэй татдаг. Тиймээс би цочирдохгүй байгаа. Бодит байдлын тухайд гэвэл, 1,4 тэрбум хүн амд ердөө 2463 мянган халдвар авсан хүн, сэжигтэй 2692 тохиолдол, 80 нас баралт ноогдож байна. 2003 онд гарсан САРС-тай харьцуулахад энэ юу ч биш. Халдвараас сэргийлэхийн тулд Ухань хотыг хаасан, хотыг орхих гэсэн хүнд эрүүгийн хариуцлага ноогдуулна. Олон нийтийн газруудад байнга халдваргүйжүүлэлт хийж байгаа, кафе яг эмнэлэг шиг үнэртэй болсон, хаа сайгүй гар ариутгагч тавьсны дээр эмийн үйлдвэрүүд амны хаалт үнэгүй тарааж байна. Хүмүүс олноор нь амны хаалт худалдаж авч байгаа ч үнэ нэмэгдээгүй, мөн олдохгүй гэх зовлон байхгүй. Одоо Хятадад вакцин боловсруулж байна, тун удахгүй вакцинтай болно. Амиа алдаж байгаа хүмүүсийн ихэнх нь олон төрлийн суурь өвчинтэй 60-аас дээш насныхан" хэмээсэн юм.
Түүнчлэн тэрбээр титэм вирус тархаагүй газруудад илүүтэй цуурхал, түгшүүр давамгайлж байгааг онцоллоо. Харин Хятад дундаа цуурхлаас илүүтэйгээр нэгнээ дэмжиж байгаа гэнэ.
"Би хятадуудтай харилцаатай байдаг, Хятадын олон нийтийн сүлжээнүүдээр байнга ордог. Тэдний нэгдмэл байдал намайг үнэхээр гайхшруулж байна. "Ухань, урагшаа", "Хятад, урагшаа", "Ухань, битгий өвдөөрэй, чи чадна", "Би Уханийг орхихгүй" гэсэн флэшмоб олон нийтийн сүлжээгээр нь дүүрэн байна. Тэд дэлхий даяар чадна, бүх зүйл сайн болно гэж дуу хоолойгоо хүргэж байна" хэмээсэн юм.
Г.Бямбасүрэн
| Уншиж байна |