ОХУ-ын Өвөр Байгал болон Тюменскд  шинэ төрлийн титэм вирусийн тохиолдол илэрсэн талаар бид баасан гаригт мэдээлсэн. Орост хоёр тохиолдол бүртгэгдсэн бөгөөд хоёулаа Хятадын иргэн гэж ТАСС мэдээлсэн юм. 

Титэм вирусийн халдвартай гэж сэжиглэгдэн Чита хотын халдвартын эмнэлэгт хүргэгдсэн БНХАУ-ын иргэдийн нэг болох Ван Юньбинь "Чита.ру" мэдээллийн агентлагтай холбогдон, нөхцөл байдлын талаар мэдээлэл өгсөн байна. 

Тэрбээр эмч нар түүнд харилцан адилгүй онош тавьсан гээд зургаан удаа шинжилгээ авсан ч хариу нь бүгд хоорондоо зөрж байгаа тул онош нь тодроогүй гэж сэтгүүлчид ярьжээ. 

Чита.ру сайтын мэдээлснээр Ван Юньбин Чита хотод ажиллаж амьдардаг, Орос эхнэртэй гэнэ. Тэрбээр Хятадын дорнын хуанлиар шинэ оноо угтах баяраар БНХАУ руу гэр бүлийнхэнтэйгээ хамт аялаад, эргэж ирснийхээ дараа титэм вирусийн халдвартай байж болзошгүй гэсэн шалтгаанаар эмнэлэгт тусгаарлагджээ. 

"Би одоо зөвхөн ханиалгаж л байгаа, халуураагүй. Үүнээс өмнө цэртэй ханиаж байсан. Одоо биеийн байдал сайн байна" хэмээн  Юньбинь өгүүлжээ.

Тэрбээр хэн нэгэнд халдвар тараахыг хүсэхгүй байгаа ч Орос эмч нар түүнтэй хэрхэн харилцаж байгаад ихээхэн гайхаж байгаагаа илэрхийлсэн байна. 

"Би халдвар авсан эсэхээ яв цав мэдмээр байна. Эмч, сувилагч нар хамгаалалтын арга хэмжээгээ сайжруулаасай гэж хүсч байна. Тэд надаас халдвар авч болзошгүй тул хамгаалах арга хэмжээг дээд зэргээр авахыг хүсч байна" хэмээн тусгаарлагдсан иргэн өгүүлжээ.

Түүнчлэн Юньбинь Чита хотын эмнэлэгт мөн л аюултай вирусийн шинж тэмдэгтэйгээр хүргэгдсэн хоёр настай охиныхоо төлөө санаа зовниж байгаагаа илэрхийлжээ. Мөн онош нь батлагдвал охиныг нь өөр эмнэлэгт хүргэхийг хүсч байгаа гэнэ.

"Охиныг минь өөр эмнэлэгт хүргэхийг хүсч байна. Энд сайн эмчилгээ авч чадахгүй. Эндэхийн эмнэлэгт сайн тоног төхөөрөмж байхгүй бололтой" хэмээн Юньбинь өгүүлжээ.

Г.Бямбасүрэн