Олон улсын усанд сэлэлтийн холбоо (FINA)-ноос 2019 оны шилдгүүдээ усан спортын зургаан төрөлд зарлав. Сэлэлтээр эрэгтэй тамирчдаас АНУ-ын Кэлеб Дрессел, эмэгтэйчүүдээс Шведийн Сара Шёстром нарыг шилдгээр тодруулжээ. Америк эрийн хувьд Кванжуд болсон ДАШТ-ээс найман медаль (өврөөр даллах 50 м, 100 м, мэлхий сэлэлтийн 50 м, 100 м, 4х100 м-ийн өврөөр даллах буухиа, холимог багийн буухиад алт, 4х100 м-ийн холимог, багийн холмог буухиад мөнгөн медаль) зүүснээс гадна 100 метрийн мэлхий сэлэлтээр Майкл Фелпсийн тогтоосон дэлхийн дээд амжилтыг шинэчилсэн билээ.

Шёстром 50 м-ийн мэлхий сэлэлтээр алт, 50 м-ийн өврөөр даллах, 100 м-ийн мэлхий сэлэлтэд мөнгө, 100 м, 200 м-ийн өврөөр даллах төрөлд хүрэл медалиар энгэрээ мялаажээ. Сонирхолтой нь Дрессел, Шёстром нар хамтдаа 2017 онд хамтдаа анх удаа шилдгээр шалгарсан байна. Усанд үсрэлтийн шилдгээр БНХАУ-ын Шие Сиюи, Ши Тинмао нар ДАШТ-ий хос алтан медалийн амжилтаараа тодорлоо. Уран сайхны сэлэлтийн шилдгээр ОХУ-ын Светлана Ромашина, Светлана Колесниченко, Александр Мальцев, задгай усны сэлэлтийн шилдгээр Унгарын Кристоф Рашовски, Бразилийн Ана Марсела Кунья, усан бөмбөгийн шилдэг багаар дэлхийн аварга Итали, АНУ-ын багууд тус тус шалгарав.

М.Бүүвэй