Эдийн засагч Л.Наранбаатар АН-ын даргын зөвлөх З.Энхболд болон ”Страто” компанийн талаар мэдээлэл хийлээ.
Тэрбээр:
-Би АН-ын даргын зөвлөх З.Энхболд өөрийн улс төрийн эрх мэдлээ ашиглан нийтийн эрх ашгийг хохироосон байж мадаггүй гэдгийг АТГ, ТЕГ, прокурорт өгөхөөр материалаа бэлтгээд ирсэн байна. "Страто", "Хишиг арвин", "Суруга Монгол" гэсэн гурван компанитай холбоотой асуудаал хуулийн байгууллагад З.Энхболдыг өгч байна.
“Страто” ХХК-ийн Гүйцэтгэх захирлаар А.Баттүшиг гэдэг хүн ажилладаг. З.Энхболдын төрсөн дүү З.Хишигтогтох нь тэрхүү А.Баттүшигтэй хамтран хоёр компани эзэмшиж байна. Энэ хоёр компанийн Гүйцэтгэх захирлаар А.Баттүшиг ажилладаг. Тэр бүү хэл З.Хишигтогтох, А.Баттүшиг нар бүр нэг өрөөнд суудаг гэдгийг би өмнө нь илчлэхэд намайг З.Энхболд цагдаад өгөн шалгуулж, хувийн хонгил руугаа оруулахыг оролдсон.
"Страто" компани олон хууль зөрчсөн. Шивээ овоо суманд “Страто” ХХК нь 1.5 сая тонн нүүрс угаах хүчин чадалтай үйлдвэрийг 2018 оны тавдугаар сард барьж ашиглалтад оруулсан байна. Энэ компани техник, эдийн засгийн үндэслэл нь батлагдаагүй байхад долоон сарын өмнө ашиглалтад орсон байна. Энэ компанийн 50 хувь Хятадын, 37 хувийг З.Энхболдын төрсөн дүү эзэмшдэг. Энэ компани сард 50 мянган тонн нүүрс авч угаагаад цааш нь зарж байна. Энэ компани “Эрдэнэс Тавантолгой” ХК-иас жилд 1.5 сая тонн нүүрс худалдан авч угааж ашиг олж байна.
Энэ компани одоо хүчин чадлаа өртгөж, жилд 4.5 сая тонн нүүрс угаадаг хүчин чадалтай болж байна. Жилд 2.1 их наяд төгрөгийн ашигтай. БНХАУ-ын хөрөнгө оруулалттай З.Энхболдын компанийн орлогыг Монголын 2.1 сая хүнд хуваахад хүн бүрд 1 сая төгрөг ногдохоор байна. Ийм их ашиг олдог атлаа улсад татвар төлөхгүй хэмээн Үндсэн хуулийн цэцэд маргаан үүсгээд явж байна.
“Страто” ХХК-ийг З.Энхболд байнга өмгөөлдөг. “Эрдэнэс Тавантолгой” ХК-иас 1.5 сая тонн авч ашиг олдог мөртлөө АМНАТ-ийг төлөхгүй байх хуулийг батлуулах гэж хичээсэн. З.Энхболдын эхнэр н.Бат-Өлзий гэдэг хүн байгаа. Аль ч нам ялсан энэ эмэгтэй Хууль зүйн яаманд газрын даргын ажил хийж байна. Тэр хүн З.Энхболдын хувийн хонгилыг ажиллуулж, хэлмэгдүүлэх ажил хийдэг.
Дараагийн асуудал, З.Энхболд “Хишиг арвин” гэдэг ХХК-тай холбоо хамааралтай. “Ардчилсан хүчний холбоо”-г З.Энхболдтой хамтран үүсгэн байгуулагчдын нэг болох М.Тулгат гэгч нь “Хишиг арвин” гэдэг ХХК-ийн Гүйцэтгэх захирлаар ажиллаж байсан. Хамаарал бүхий энэ компани “Эрдэнэс Тавантолгой” ХК-ийн талбайд хөрс хуулж, асар их ашиг олж байгаа. Хамгийн багадааа жилд 3 их наяд төгрөгийн ашиг энэ компани олж байна.
Улс төрийн нөлөө бүхий хүмүүс Япон улсын иргэнийг хилсээр яллаж хөөж явуулаад “Суруга Монгол” ХХК-ийг дээрэмдэж авсан. Тэр компанийн эзэмшиж байсан газар дээр “Хүннү 2222” гэдэг хороолол боссон. Энэ хорооллын таван орон сууцны наймдугаар давхрыг тэр чигт нь З.Энхболдын төрсөн дүү авсан байна. Энэ байруудын үнэлгээ нь 4-5 тэрбум төгрөг хүрнэ. Тэр хүн ямар мөнгөөрөө ийм их байр авсан асуудлыг хуулийн байгууллагуудаар шалгуулж тогтоолгоно.
З.Энхболд гэдэг хүн Монголын нийт ард иргэдэд очих ёстой ашгийг ганцаараа сорж байгаа учраас би тэр хүнийг шалгуулах хүсэлтээ гаргаж байна. Хоёрдугаар З.Энхболыг хаана нэр дэвшинэ, би тэр тойрогт нь өрсөлдөнө хэмээн мэдээлэв.
Н.Нягт