Улсын онцгой комиссын хуралдаан болж, өндөржүүлсэн бэлэн байдлын зэрэглэл болон сургууль, цэцэрлэгийн үйл ажиллагаа хөл хорио, олон улсын нислэгийг түр зогсоосон хугацааг дөрөвдүгээр сарын 30-ныг хүртэл сунгажээ. Гадаадаас иргэдээ авчрах тусгай нислэг 14 хоногийн хугацаанд явахгүй юм байна. ЗТХ-ын сайд Б.Энх-Амгалан сэтгүүлчдийн асуултад хариуллаа.
-Эдийн засгийн хүндрэлийг хэрхэн зохицуулах вэ?
-Төмрийн хүдэр, нүүрс, жонш, зэсийн баяжмалаа гаргадгаараа гарна. Замын-Үүдээр нүүрс тээвэр явж байна. Одоогийн байдлаар 16 мянган тонн нүүрс гарсан байна. Ирэх долоо хоногт Гашуунсухайтын тээвэр эхэлнэ. Гэхдээ олон тээвэр хийхгүй. Зөвхөн контейнерийн тээврээр 70-100 орчим тээврийн хэрэгслээр хийнэ. Газар дээр нь мэргэжлийн хүмүүс ажиллаж байгаа. Жолооч хамгаалалтын хувцастай, масктай, нүдний шилтэй байна. Жолооч гарч хүнтэй бууж харьцахгүй. Хилээр гарангуут нь контейнерээр нь Хятадтын талд буулгаад, зөрөөд хоосон контейнертэй ирнэ. Машинаасаа буухгүй, тэндээ хоол идэхгүй, хонохгүй, хүнтэй харилцаанд орохгүй зохицуулалт хийнэ.
-Гадаадаас ирсэн зургаан иргэний талаар мэдээлэл хомс байна. Солонгост байгаа иргэд энэ асуудлаар түгшүүртэй байгаа.
-Бид зургаан иргэнийг онгоцоор авчирахдаа ХӨСҮТ-ийн мэргэжлийн эмч, мэргэжлийн байцаагч нартай явсан. Онгоцонд тусгаарлах арга хэмжээ авсан. Ирээд ХӨСҮТ-д тусгаарлах арга хэмжээ авсан. Тиймээс манайхан ямар нэг байдлаар харьцаа үүсгээгүй. Өндөр хяналтад байгаа.
-Бүтээн байгуулалтын улирал эхэллээ. Энэ жил зогсоох уу? Дарханы замыг яах вэ?
-Ажиллах хүчний асуудлыг Засгийн газар дээр ярьсан, мэдээлэл хийсэн. Хувийн аж ахуйн нэгж болон онцгой шаардлагатай төслүүд дээр гаднын ажиллах хүчнийг оруулах бололцоо байхгүй. Онцгой шаардлагатай, гэрээтэй ажлууд дээр ажиллах хүч авна. Дарханы зам дээр ажиллах 105 хүнийг бүтэн сайн өдөр тусгай үүргийн онгоцоор татаж авна. Хятад улсад нь коронавирусийн шинжилгээ өгч, виз авна. Энд ирээд тусгай хамгаалалтанд авч, Төв аймагт карантилна. 14 хоногт карантилсны дараагаар шинжилгээний хариуг харж байгаад ажилд нь оруулна.
Н.Нягт