Амны хаалт ихээр нийлүүлэх аман тохиролцоонд хууртаж 117 сая төгрөгөө залилуулжээ
3-25

Шинэ төрлийн короновирус /COVID-19/-тэй холбоотойгоор дэлхий нийтэд үүсээд буй нөхцөл байдлыг ашиглан олон нийтийн сүлжээнд “Маск болон гар ариутгагч худалдаа, хүргэлт”, “Бөөний худалдаа, хүргэлт” гэх мэт хуурамч хаяг нээн хямд маск гар ариутгагч зарна, хүргэнэ гэж иргэдийн хувийн мэдээллийг авах, тус пэйж хуудсыг богино хугацаанд олон хандалт авахуулан цааш зарж борлуулах, зах, худалдааны төвүүд хааж байна, өргөн хэрэглээний бараа бүтээгдэхүүний хомсдол үүсэж байна гэх мэдээлэл түгээж иргэдийн сэтгэл зүйг түгшээх зураг, мэдээллийг нийтэлж худал мэдээлэл удаа түгээж байгааг цагдаагийн байгууллагаас анхаарууллаа.

 

 

ЦЕГ-ын урьдчилан сэргийлэх хэлтсийн чиглэлийн ахлах мэргэжилтэн цагдаагийн дэд хурандаа Б.Чулуунтамир "Гадаад орнуудад ч мөн цахим хуудас, интернет худалдааны платформууд, олон нийтийн сүлжээ, электрон шуудангийн хаяг ашиглаж амны маск үйлдвэрлэдэг нэр хүндтэй компаниудын нэр ашиглан улс дамнан залилах гэмт хэрэг үйлдэгдсэн байна. Мөн короновирус /COVID-19/-тэй тэмцэж байгаа төрийн байгууллага, алба хаагчид, хүнд өвчтэй хүнд хандив цуглуулах нэрийдлээр хуурамч хаяг нээн компанит ажил өрнүүлэн иргэдийг залилах явдал гарах боллоо.

 

Иргэдээс төрийн байгууллагын албан ёсны эх сурвалжаас мэдээлэл авахгүйгээр цахим орчин дахь бодит бус мэдээлэлд хэт итгэх, мэдээлэл, пост, постерын үнэн зөвийг нягтлахгүй шийдвэр гаргах, ойр дотнын найз нөхдөдөө зөвлөгөө, мэдээлэл өгөх байдлаар бусдад залилуулж байна. Цагдаагийн байгууллагад шинэ төрлийн короновирус /COVID-19/-тэй холбоотойгоор бусдад залилуулсан, хуурамч мэдээлэл тараасан талаар 25 дуудлага мэдээлэл ирсэнийг мөрдөн шалгаж байгаа" гэлээ.

 

Бүртгэгдсэн гэмт хэргээс дурдвал:

 

БНХАУ-ын Эрээн хотод амьдардаг Монгол улсын иргэн Д гэгч нь 2020 оны 01 дүгээр сарын 31-ний өдөр “маск их хэмжээгээр нийлүүлнэ” гэж иргэн Б-д санал болгож 8.400.000 төгрөг шилжүүлэн авч залилсан. 

 

“Онлайн шоп”-оор маск худалдана гэсэн зарын дагуу иргэн Г, М нар нь Холбооны Бүгд Найрамдах Герман улсын компанируу энэ оны 03 дугаар сарын 02-ны өдөр 117.0 сая төгрөг урьдчилгаа шилжүүлэн залилуулсан.

 

Гэрэл зургийг MPA.mn

 

Иймд иргэд та бүхэн сэрэмжтэй байж, дараах мэдээллийг сайтар нягтлан шалгаж, өөрийгөө болон бусдыг эрсдлээс урьдчилан сэргийлээрэй. Үүнд:

 

1. Хуурамч цахим хуудас, интернет худалдааны платформууд, олон нийтийн сүлжээ, электрон шуудангийн хаяг ашиглан амны хаалт /маск/-ны борлуулалт, хүргэлтийн үйлчилгээ үзүүлдэг компани гэж итгүүлэн төлбөрийг урьдчилан авч залилах.

 

2. ДЭМБ, олон улсын байгууллагаас коронавирусаас урьдчилан сэргийлэх заавар, зөвлөмж өгч буй мэтээр фишинг цахим холбоосуудыг олон нийтийн сүлжээнд байршуулж иргэдийн хэрэглэгчийн нэр, нууц үгийг авч таны компютер, гар утас дээрх файлуудыг зөөх, шилжүүлэх, банкны шилжүүлэг хийх.

 

3.Короновирус /COVID-19/-ээс урьдчилан сэргийлэх, тэмцэх чиглэлээр ажиллаж байгаа төрийн байгууллага, алба хаагчдад туслах, хүнд өвчин туссан хүүхэд, өвчтэй болон гамшиг, осолд өртсөн хүмүүсийн зураг тавьж тэдэнд туслах зорилгоор хандив цуглуулж байна гэж итгүүлэн, хуурамч хаяг нээн компанит ажил өрнүүлж иргэдийг залилах.

 

Иймд худал мэдээлэлд автаж, нягтлахгүйгээр бэлэн мөнгөө бусдын данс руу урьдчилгаа болгон шилжүүлэхгүй байхыг цагдаагийн байгууллагаас анхааруулж “Бүү сандар, бүү хуурт, бүү өг” гэдэг уриалгыг дэвшүүллээ.

 

Г.Сүрэн

Shuud.mn
Сонин хачин
Зочин:
Энэ бол энэ хүмүүсийн өөрсдийнх нь буруу өвчин зовлон тархаж ард иргэд өөрсдийнхөө эрүүл мэндийг хамгаалах гэсэн сэтгэлээр далимдуулж их хэмжээний ашиг олох гэсэн үйлдэл. Цагдаад л ажил удах юм даа өөрсдөө их хэмжээний ашиг олсон бол татварын албанд өөрөө очиж татвараа төлөхгүй дээ. Сонин улс ашгийн төлөө яваад эргэж нэгнээ залилан мэхэлсэн хэрэгт унагаадаг энэ муухай зангаа манайхан болих хэрэгтэй. Цагдаагаас ятгах тусам улам нягтал гэж арга хэмжээ зөндөө явсан даа. Сошиал зар ер нь бүтэхгүй дээ манайхан
2020-03-25
irgen:
odoo ene torliin gemt hereg delhii dayar ih baina shyydee bolgoomjtoi baigaach, barag byh online naimaand byy itgeechee hairan mongo...
2020-03-25