Москвагаас эх орон уруугаа буцах Монголын оюутнуудыг тээвэрлэхэд Монгол Улсын Ерөнхий консулын газарт дэмжлэг үзүүлэхийг Буриадын тэргүүн Алексей Цыденов Засгийн газартаа үүрэг болгосон талаар тус улсын Засгийн газрын хэвлэлийн алба мэдээллээ.
Орос улс бусад орнуудтай харилцах агаарын харилцаа зогссон тул 100 орчим оюутан Буриадаар дамжин Монгол руу явна гэж хэвлэлийн алба мэдээлсэн байна.
SmartAvia агаарын тээврийн компанийн дотоодын тусгай нислэг дөрөвдүгээр сарын 11-ний өдөр Москвагаас оюутнуудыг тээвэрлэн Улаан-Үд хотын "Байкал" олон улсын нисэх буудал дээр газардах аж. Энэ буудал дээр оюутнуудыг Буриадын соёл, спорт, залуусын бодлогын яамнаас гарган өгсөн автобус, машинууд тосч, Хиагтын автозамын шалган нэвтрүүлэх боомтоор нэвтрэх юм байна.
Улмаар оюутнуудыг тээвэрлэн, хил хүргээд буцсан бүхий л тээврийн хэрэгслүүдийг халдваргүйжүүлнэ хэмээн Буриадын Засгийн газрын хэвлэлийн алба мэдээллээ.
"Хөрш орондоо туслах нь нэн чухал гэж үзэж байна. Шаардлагатай тээврийн хэрэгслийг гарган, дагалдан явж, оюутнуудыг нисэх буудлаас Орос-Монголын хил хүртэл хүргэж өгөх ажлыг зохион байгуулах хэрэгтэй. Мөн тухайн тээврийн хэрэгслүүдийн халдвар тархалтын аюулгүй байдлыг хангах нь чухал. Энэ ажлыг холбогдох газрууд гүйцэтгэхийг хүсч байна " хэмээн Буриадын тэргүүн Алексей Цыденов мэдэгджээ.
Г.Бямбасүрэн