Эрүүл мэндийн яамнаас COVID-19 халдварын цаг үеийн нөхцөл байдлын тухай ээлжит мэдээллийг /2020.04.13/ хийлээ. Хэвлэлийн хуралд ХӨСҮТ-ийн захирал Д.Нямхүү, Эрүүл мэндийн яамны Тандалт, шуурхай удирдлагын хэлтсийн дарга Д.Нарангэрэл, ЭМЯ-ны Гадаад харилцааны хэлтсийн дарга Б.Янжмаа, ДЭМБ-ын мэргэжилтэн О.Ариунтуяа нарын албаны хүмүүс оролцов.

ХӨСҮТ-ийн ерөнхий захирал Д.Нямхүү "ХӨСҮТ-д өчигдөр тусгаарлагдсан 20 хүний нэгнээс COVID-19 илэрлээ. Ингээд Монгол Улсад албан ёсоор батлагдсан тохиолдол 17 боллоо. Үүнээс дөрвөн хүн эдгэрч эмнэлгээс гарсан бол 13 хүнд лабораторийн эмчилгээ хийгдэж байна" гэлээ. 

ХӨСҮТ-д эмчлүүлж байгаа Туркийн иргэнийг эмнэлгээс гаргасан гэх мэдээлэл тархсан. Энэхүү мэдээллийг Эрүүл мэндийн яамнаас үгүйсгэж, буруу ташаа мэдээллийг гаргаж ард түмний дархлааг сулруулж, эрүүл мэндийн салбарын үйл ажиллагааг харлуулах үйл ажиллагаа явуулахгүй байхыг хүслээ.

ОХУ-аас манай улсын 281 иргэн Алтанбулагийн боомтоор өчигдөр /2020.04.12/ эх орондоо ирсэн. Эдгээрээс 169 хүн Улаанбаатар ирснээс 149-ыг ажиглах байранд, 20 хүнийг ХӨСҮТ-д тусгаарласан байна. Хойд хилээр орж ирсэн эдгээр иргэнд шинжилгээ хийсэн бөгөөд одоогоор нэг хүн вирусийн халдвар  авсан нь батлагдаад байгаа аж. Иргэдийг нэг, нэгээр тусгаарлагдсан байгаа бөгөөд батлагдсан тохиолдлын ойрын хавьтал буюу хилээр хамт орж ирсэн хүмүүсийг давхар хяналтад авсан байна.

Мөн ОХУ-д манай улсын хоёр иргэн COVID-19 халдвараар өвчилсөн. Эдгээр иргэнийг авчрах Улсын Онцгой комиссын шийдвэр гарвал эх оронд нь авчрах талаар ярилцаж байгаа аж. 

ОХУ-д өвчлөл эрчтэй нэмэшдэж өнгөрсөн амралтын өдрөөр 2686 шинэ тохиолдол бүртгэгдсэн бол өнөөдрийн байдлаар хойд хөршид COVID-19 халдварын улмаас 24 хүн нас бараад байна. Испани улсад халдвар дөрөв дахин, Франц улсад тав дахин нэмэгджээ. Итали, Испани, Герман, Франц зэрэг өвчлөл өндөр байсан оронд өнгөрсөн долоо хоногт халдвар буурах хандлага ажиглагдаж, тогтворжих хандлагатай байна гэж ДЭМБ-аас мэдээллээ. 

Өнгөрсөн 24 цагийн хугацаанд Испани улсад 619 нас баралт бүртгэгдсэн байна. Турк улсад халдвар эрчимтэй тархаж шинэ тохиолдол 4789-өөр нэмэгджээ. Япон улсын Токио хотод өнгөрсөн ням гарагт 166 шинэ тохиолдол бүртгэгдэв. Улмаар улсын хэмжээнд нийт халдварын тохиолдол 7400-д хүрчээ. БНСУ-д халдвар авч эдгэрсэн гэж  үзсэн нийт 111 хүнд халдвар дахин илэрсэн байна. 

ДЭМБ-аас гурван вакциныг турших эмнэлзүйн шат буюу хүний бие дээр турших үйл ажиллагааг үргэлжлүүлж байна.

Г.Сүрэн