Төрийн албаны зөвлөл, “Монгол Улсад мэргэжлийн, иргэн төвтэй төрийн албыг төлөвшүүлэх нь” төслийн хүрээнд Төрийн албаны ерөнхий шалгалтын сорил, даалгаврын санг шинжлэн, судлан сайжруулах эрдэмтдийн багийн Ажлын хэсэг ажиллаж байна. Тус Ажлын хэсэгт  ШУА-ийн Түүх, угсаатны зүйн хүрээлэн, ШУА-ийн Нийгмийн ухааны салбар,  ШУА-ийн Философийн хүрээлэн, Төрийн албаны зөвлөл зэрэг байгууллагуудын төлөөлөл болох эрдэмтэн судлаач, доктор, профессорууд ажиллаж байна. Төрийн албаны зөвлөлийн өнөөдрийн ээлжит бус хуралдаанд тус Ажлын хэсэг шалгалтын тестэд ажилласан тайлан , дүгнэлтээ танилцуулав.

Уг тайланд,Монголын түүх нь нийгмийн ой санамж мөн тул түүхийн асуултуудыг Төрийн албаны ерөнхий шалгалтад зайлшгүй байх нь зүйтэй гэж үзэв. Ингэхдээ Төрийн албаны ерөнхий шалгалтын нийт тестийн хүрээнд Монгол Улсын төрийн албан хаагчдын хувьд монголын түүхэнд эерэг агуулга хандлагатай асуултууд байх нь зүйтэй гэж  Ажлын хэсгийн эрдэмтэд үзжээ.

Мөн нийт тестийн хүрээнд тодорхой зарчмыг баримтлан ажилласан бөгөөд Монгол Улсын төрийн албан хаагчдыг сонгон шалгаруулах үйл явцын суурь болж буй төрийн албаны шалгалтын сорил даалгаварт Монгол Улсын нийгэм, эдийн засгийн хөгжлийн ололт туршлага, сургамж, ирээдүйн чиг хандлагыг илэрхийлсэн мэдлэг олгох асуулт түлхүү байх нь зүйтэй хэмээн үзэж байлаа.