Дэлхий даяар цар тахал дэгдсэн энэ хүнд нөхцөлд вирустэй тэмцэх тэргүүн эгнээнд зогсож байгаа эмнэлгийн ажилтнуудад олон орон төрөл бүрээр талархлаа илэрхийлсээр байгаа юм. 

Саяхан АНУ-ын уран нислэгийн үзүүлбэрийн багийнхан COVID-19 вирустэй тэмцэж буй эмнэлгийн ажилтнуудад хүндэтгэл илэрхийлж, томоохон хотуудад агаарын үзүүлбэр үзүүлж байв. Үүний араас Энэтхэгийн Агаарын цэргийн хүчин эмч нарт хүндэтгэл илэрхийлжээ. 

Энэтхэгийн Батлан хамгаалах яамны мэдээлснээр, Делид амиа алдсан цагдаагийнханд зориулсан хөшөө болон нийслэлийн 12 эмнэлэгт ажилладаг эмнэлгийн ажилтнуудын дээрээс тус улсын Агаарын цэргийн хүчний нисдэг тэрэгнүүд сарнайн дэлбээ асгасан байна. 

COVID-19 вирустэй тэмцэгчдийг хүндэтгэн Дели хотын тэнгэрт Lockheed C-130 цэрэг-тээврийн гурван онгоц, Су-30МКИ, МиГ-29 болон Jaguar гурван сөнөөгч нисчээ. Үүний дараахан арга хэмжээнд тэнгисийн цэргийн флот нэгдэж, таван хөлөг онгоц дохионы пуужин хөөргөж, дуут дохио хангинуулсан байна. Түүнчлэн хөнөөлт вирусийг дарж буй "дайчдад" талархлаа илэрхийлсэн зурагт хуудас өлгөжээ.

ВИДЕО: Эмч нарт талархал илэрхийлж, агаарын шоу зохион байгуулжээ

Г.Бямбасүрэн