“ШИНЭ" эвслээс нэр дэвшигчдийн талаар албан ёсны мэдээлэл хийлээ.
“ШИНЭ" эвслийн тэргүүн Ж.Батзандан:
-Цэцийн дээд суудлын хуралдааныг бид онцгой анхааралтай ажиглах ёстой гэдэг байр суурьтай байгаа иргэд олон түмний анхаарлыг бас хандуулах хүсэлтэй байна.
Тавдугаар сарын 20-нд Төв аймгийн шүүх дээр Б.Содномдаржаа, Т.Чимгээ нарыг эрүүдэн шүүсэн есөн хүний шүүх хурал болох гэж байна. Хүний эрхийн байгууллагуудыг Төв аймгийн шүүх хурал дээр анхаарлаа хандуулж ажиллахыг, шударга иргэдийг суллах, чөлөөлөх, үйл ажиллагаанд нэгдэж хамтарч ажиллахыг уриалж байгаа.
Нэр дэвшигч нартай холбоотой судалгаа хийсэн. Нийтдээ 700 гаруй нэр дэвшигч дэвшиж байна. Улаанбаатар хотын тойргууд дээр ойролцоогоор 20 гаруй хүн нэр дэвшиж байна гэж ойлгож болно. Нийт 700 гаруй нэр дэвшигчдийн дотор 100 гаруй яллагдагч, шүүхийн шийдвэрийн өртэй этгээдүүд авилга, албан тушаалын хэрэгт холбогдсон, хөгжлийн банкнаас их хэмжээний зээл авсан, арилжааны хэд хэдэн банкыг дампууруулсан хүмүүс нэр дэвшиж байгааг хараад харамсаж байгаа. Улс төрийн намууд нэр дэвшигч дээрээ хариуцлагатай хандах ёстой. ЖДҮ, авилгачид нэр дэвшсэн байна. МАНАН бүлэглэлийн гар хөл болсон нөхдүүд зүсээ хувиргаж нэр дэвшиж орж иржээ. Зарим нь намуудаас нэр дэвшсэн, зарим нь бие даагчийн дүр эсгэж дэвшиж байна. Монголын сонгогчдын улс төрийн боловсрол өндөр болсон. Зүсээ хувиргасан нэр дэвшигчдийг хөөгөөд явуулах ухаан Монголын сонгогч нар, жирийн ард түмэнд байгаа гэдэгт бид итгэж байна. СЕХ зүсээ хувиргасан гэмт хэрэгтнүүдийг бүртгэж авахгүй байх тал дээр онцгой анхаарах байх гэж итгэж байна.
МАНАН бүлэглэл гэж ямар аймшигтай бүлэглэл байдгийг, УИХ-ын таван гишүүн сүүлийн гурван жил ярьж МАНАН бүлэглэлийн эсрэг тэмцэл явуулж байгаа. Одоо дэслэгчдийг Т.Бадамжунай, Б.Хурц, О.Баасанхүү нарын бичлэг шиг олон бичлэгүүд гарна. МАНАН-н бузар булхайг УИХ-ын таван гишүүн улам их илчлэх болно. МАНАН-ын эсрэг тэмцэл үргэлжилнэ. Монгол төрөөс МАНАН-г зайлуулахын төлөө “ШИНЭ” эвсэл энэ сонгуульд бүх хүч чадлаа дайчлан оролцох болно гэдгээ та бүхэнд дуулгаж байна.
Г.Мичидмаа