Баянзүрх дүүргийн 26 дугаар хорооны нутаг дэвсгэр, Үндэсний цэцэрлэгт хүрээлэнгийн талбайн урд хэсэг, Туул гол дагуух Маршалын гүүрнээс зүүн тийш орших “Хан талст” ХХК-ийн зөвшөөрөлгүй газарт барилгын ажил хийгдэж байснаас үүдэлтэй усан толионд өсвөр насны дөрвөн хүүхэд эндэж, амь насаа алдсан харамсалтай хэрэг гарсан.
Нийслэлийн Засаг дарга бөгөөд Улаанбаатар хотын Захирагч С.Амарсайхан тавдугаар сарын 10-ны өдөр тухайн газарт очиж ажиллан, Үндэсний цэцэрлэгт хүрээлэнд баригдаж байгаа дугуйн замын ажлыг шалгах явцдаа зөвшөөрөлгүй барилга барьж байсан “Хан талст” ХХК-ийн үйл ажиллагааг шалгах Ажлын хэсэг байгуулах шийдвэр гаргаж байв. Энэ дагуу ажлын хэсэг байгуулагдаж, тухайн газарт хяналт шалгалт хийсэн ажлын хэсгийн үр дүнгээ тавдугаар сарын 21-ны өдрийн Нийслэлийн Засаг даргын зөвлөлийн хуралдаанаар танилцуулсан юм. Шалгалтаар “Үндэсний цэцэрлэгт хүрээлэн” ОНӨТҮГ-ын эргэн тойрон дахь газруудад зөрчил дутагдал маш ихээр илэрсэн учраас тухайн компанийн үйл ажиллагааг зогсоох шийдвэр гаргасан байв.
Харамсалтай нь зөрчлөө арилгаагүй, зөвшөөрөлгүй үйл ажиллагаа явуулсан компанийн балгаар дөрвийн дөрвөн бяцхан халуун амь хорвоог орхилоо. Энэхүү харамсалтай үйл явдалтай холбогдуулан Нийслэлийн Засаг дарга С.Амарсайхан Үндэсний цэцэрлэгт хүрээлэнгийн захирал С.Эрдэнэтуулийг үүрэг ажлаас нь чөлөөллөө. Ажлаас халаад л асуудал шийдэгдчихгүй. Бас "Аз жаргалтай хот"-д минь тохиолдож буй анхны золгүй явдал ч энэ биш.
Хоёр жилийн өмнө /2018.06.13/ Үндэсний соёл амралтын хүрээлэн буюу бидний нэрлэж заншсанаар хүүхдийн паркийн эргэлддэг пуужин буюу "Сансрын хөлөг" тоглоом доош унаснаар хүүхдүүд гэмтсэн хэрэг гарсан. Энэхүү ослын улмаас дөрвөн хүүхэд гэмтсэн. Үндэсний соёл амралтын хүрээлэнгийн тоглоомуудад Нийслэлийн мэргэжлийн хяналтын байгууллага болон Цагдаагийн байгууллагаас хамтарсан шалгалтыг хийж “Сансрын хөлөг” тоглоом нь насжилт өндөртэй, хуучирсан гэдэг дүгнэлтийг гаргаж байв.
Хүүхдийн парк хамгийн аюулгүй, эрсдэлгүй байх ёстой. Тиймээс ч тэнд хүүхдүүд эрх дураараа, тоглож, наадах нь зөв. Гэтэл тоглоом нь дундуураа хуваагдан унаж, хүүхдийн инээд хөөр цалгиж байх паркад уйлаан, шуугиан болсон. Азаар хүүхдийн амь нас эрсэдсэнгүй.
Паркийн тоглоом эвдэрсэн хэрэг гараад долоо ч хоноогүй байтал /2018.06.18/ сургуулийнхаа хөлбөмбөгийн талбайд тоглож байсан хүү харамсалтайгаар амь насаа алдсан.
Баянзүрх дүүргийн 79 дүгээр сургуулийн хөлбөмбөгийн талбайд тоглож байсан 11 настай хүүг хөлбөмбөгийн хаалганы төмөр даран унаж амь насыг нь авч одсон.
11-хэн настай хүүгийн алтан амийг авч одсон уг төмөр хаалга үргэлж унадаг бөгөөд тус сургуулийн биеийн тамирын багш нь “14 хоногийн өмнө гангасан л юм даа” гэх тайлбарыг хэлж зогссон. Аюултай, осолтойг нь мэдсээр байж талбайгаас авч, холдуулаагүй аж. Улмаар цэцэрлэгийн насны хүүхэд тогтоосон шонд нь хүрэх төдийд хаалга унаж, хүүхдийн аминд хүрчээ.
Дараа нь 2018 оны долоодугаар сард Сүхбаатар дүүргийн 7 хороо, 11 дүгээр хорооллын 7 дугаар байрны орчимд цахилгааны утсанд цохиулж бага насны хүүхэд амь насаа алдсан харамсалтай хэрэг гарсан. Тус хороололд байрлах эмийн сангийн төмөр хаалганд тогтоосон байсан, цахилгааны богино холбоо үүссэн ил задгай утсанд хүүхэд хүрч, цахилгаанд цохиулан амь насаа алдсан.
Хүүхэд эрүүл, аюулгүй орчинд өсөн торних ёстой. Гэтэл өнөөдөр Монгол хүүхдүүдэд амьд явах баталгаа алга. Энэ асуудлыг яаж шийдэх вэ эрхэм Хотын дарга аа?!
Б.Итгэл