Сураггүй алга болсон Сөүл хотын дарга нас баржээ
7-10

 

 

БНСУ-ын нийслэл Сөүл хотын дарга Пак Вон Сон сураггүй болсноосоо хойш хэдхэн цагийн дараа нас барсан байдалтай олдлоо гэж тус хотын Цагдаагийн газар мэдээлжээ.

 

Цагдаагийн эрэн хайх баг хотын даргын цогцсыг өргөөнийх нь ойролцоох “Букак” уулын ойгоос олжээ. Түүнийг амиа егүүтгэсэн хэмээн таамаглаж байгаа ба цагдаа нар нас барсан шалтгааныг нь тогтоохоор төлөвлөж байна.

 

Өдгөө 64 настай Пак Вон Сон өмнө нь ажиллаж байсан эмэгтэй нарийн бичигтээ бэлгийн дарамт үзүүлсэн хэрэгт буруутгагдаад байсан бөгөөд уг хэргийг мөрдөн шалгах ажиллагааг явуулах төлөвтэй байжээ. Уг ажилтан “хүсээгүй байхад биед нь хүрсэн”, “зохисгүй” зурвас илгээсэн тухай албан ёсны гомдлыг Цагдаагийн газарт лхагва гарагт гаргасан гэж эх сурвалжууд мэдээлжээ.

 

“Сөүл хотын Цагдаагийн газарт гомдол ирсэн” гэж нэрээ нууцалсан цагдаагийн ажилтан мэдээлсэн боловч мөрдөн шалгах ажиллагаа эхэлсэн эсэх талаар мэдээлэл өгөхөөс татгалзсан байна. 


“Цогцост гадны нөлөөгөөр амиа алдсан шинж ажиглагдаагүй” гэж цагдаагийн ажилтан мэдээлсэн бөгөөд мөрдөн шалгах ажиллагааг хуулийн дагуу явуулна гэж нэмж хэлжээ.

 

Аав нь гэрээслэлтэй төстэй үг хэлээд гарснаас хойш 4-5 цаг өнгөрч байгаа тухай Пак Вон Соны охин оройны 17:17 минутын орчимд цагдаа нарт мэдээлжээ. Пак Вон Сон Сөүл хотын төвд байрладаг гэрээсээ өглөөний 10:44 минутад хар малгай, бараан хүрэм, хар өмд, саарал гутал өмсөж, хар үүргэвч үүрээд гарсан байна. 

 

Түүнийг сураггүй болсон тухай мэдээлэл ирсний дараа цагдаагийн ажилтнууд өргөн хүрээг хамарсан эрэн хайх ажиллагааг эхлүүлж, олон зуун ажилтан, дрон, сургуультай нохдыг дайчилжээ. Цогцсын ойролцоогоос цүнх, усны сав, гар утас, үзэг бал болон Пак Вон Соны өөрийн нэрийн хуудас олдсон байна.

 

Цогцсыг шөнийн 3:30 минутын орчимд Сөүлийн Үндэсний их сургуулийн эмнэлгийн цогцос хадгалах газарт хүргэжээ. Цагдаа нар задлан шинжилгээ хийх эсэх талаар ар гэрийнхэнтэй нь зөвлөлдөх аж.

 

Эрх баригч Ардчилсан намын гишүүн Пак Вон Сон 2011 оноос хойш Сөүл хотын даргын албыг хашиж байсан бөгөөд түүнийг 2022 оны ерөнхийлөгчийн сонгуульд нэр дэвших боломжтой нэгэн хэмээн үзэж байжээ.

 

Хүний эрхийн өмгөөлөгч, иргэний нийгмийн идэвхтэн байсан түүний бүрэн эрхийн хугацаа дуусахад хоёр жил үлдсэн байжээ. Хуулийн дагуу Сөүл хотын засаг захиргааны нэгдүгээр орлогч дарга Со Жён Хюп 2021 оны дөрөвдүгээр сард болох сонгууль хүртэл хотын даргын үүргийг түр орлон гүйцэтгэнэ.

 

Эх сурвалж: Yonhapnews

Shuud.mn
Сонин хачин
мөнхнаран ээж
2020-07-13
Зочин:
Урд нь манай хүн золиос болж байсан одоо энэ өөрийнх нь хүн амиараа ер нь солонгос хүүхнүүд төрүүлсэн ХҮҮГЭЭ ч хүчингийн хэрэгт гүтгэж мөнгө нэхэж мэдэх амилсан шулмасууд юм байна даа дараа төрөлдөө лалын ертөнцөд дахиж эмэгтэй болж төрөөрэй тэгээд тэнд санаа нь хэр зэрэг хэрэгжих нь хараг гэж хэлмээр
2020-07-10
Hend hamaatai yum:
Naadam ehelj baihad iim garnii balai medee hereggui
2020-07-10