2020-2021оны хичээлийн жилийн нийслэлийн ЕБС-ийн 1 дүгээр ангийн цахим элсэлтийн талаар Нийслэлийн боловсролын газраас мэдээлэл хийлээ. 

Нийслэлийн Боловсролын газрын дарга Ж.Гантулга

-Өндөржүүлсэн бэлэн байдалд орсон энэ үед хичээл сургуулийг есдүгээр сарын нэгнээс танхимын хэлбэрээр эхлүүлэхээр болсон. Нэг ангид 20 сурагчаас  хэтрэхгүй сурагч суралцана.  Нийслэлд 3 өдөр танхимаар 2 өдөр цахимаар хичээл орох зэрэг зохион байгуулалтын ажлууд хийгдэж байгаа. Халдварын дэгийг баримтлан хичээллэхээс гадна сум, багууд танхимаар хичээл орох юм.

Нийслэлд гурван өдөр нь танхимаар  хичээллэх бол  2 өдөр цахимаар гэх зэрэг зохион байгуулалтын ажлууд хийгдэж байна. Цэцэрлэгийн  цахим элсэлтийг зохион байгуулахгүй. Учир нь цахим бүртгэлийг хоёр настнуудыг бүртгэхэд зохион байгуулдаг, энэ жил хоёр настай хүүхдүүдийг цэцэрлэгт хамруулахгүй учир цахим бүртгэл хийгдэхгүй. Нэгдүгээр ангийн сурагчдыг бүртгэх цахим бүртгэл өнөөдрөөс эхэлж байна. Мөн иргэд хүсвэл сургууль дээр нь биечлэн очиж бүртгүүлж болно. Сурагчдын бүртгэл наймдугаар сарын гуравнаас 27-ны өдрийн 17.00 цаг хүртэл явагдана. 

Нэгдүгээр ангид элсэгчдэд тавигдах шалгуур:

- Нийслэлд хаягтай байх

- 2014 оны нэгдүгээр сарын нэгнээс хойш төрсөн хүүхдүүдийг бүртгэнэ

- Тодорхой шалтгааны улмаас өмнө нь нэгдүгээр ангид элсэн суралцаагүй 2010 оны нэгдүгээр  сараас 2013 оны нэгдүгээр сар хүртэлх хугацаанд төрсөн хүүхдүүд элсэж болно.

- Гадаад улсын харьяалалтай хүүхдүүдийг бүртгүүлэхийн тулд  харьяа сургууль дээр нь биечлэн уулзах шаардлагатай.

Мөн нэгдүгээр ангид хүүхдээ бүртгүүлэхийн тулд Parent.edu.mn  сайтад нэвтэрнэ. Сайт руу нэвтэрч, шинэ хэрэглэгчийн бүртгэл нээх бөгөөд хуудсан дээр гарч ирсэн асуултуудад хариулж өөрийн хавтсыг үүсгэх юм байна. Нэгдүгээр  ангид бүртгүүлэгчийн цонх дээр дарж, хүүхдийнхээ регистрийн дугаарыг оруулснаар элсэх боломжтой сургуулиудын мэдээлэл гарч ирэх юм. Үүний дараа мэдээллээ хадгалж илгээх бөгөөд 24 цагийн дараа таны хүсэлт  батлагдсан болон цуцлагдсан төлөвт шилжинэ. Цөөн тохиолдолд цуцлагдана. Хүүхэд хамран сургах тойрогт бүртгэлгүй, түр оршин сууж байгаа бол тухайн хаягаар бүртгүүлэх боломжгүй, хүсэлт цуцлагдсан гэсэн хариу ирэх юм байна. 

Э.Үүрийнцолмон