2020 оны УИХ-ын сонгууль явагдаж дуусахад нэг гишүүн тангарагаа өргөж чадаагүй нь Сэлэнгэ аймгаас сонгогдсон Ж.Эрдэнэбат бөгөөд түүнийг албан тушаалын гэмт хэрэг үйлдсэн гэм буруутайд тооцсон шүүхийн шийдвэр гарч одоо давж заалдах шатандаа явж байна. Хэрвээ түүнийг гэм буруутайд тооцсон шүүхийн шийдвэр хүчин төгөлдөр болвол нөхөн сонгууль болно хэмээн Сонгуулийн ерөнхий хорооноос мэдэгдсэн.

Өнөөгийн УИХ-ын гишүүдээс эрүүгийн хэрэгт холбогдон шалгагдаж байж болзошгүй өөр эрхмүүд байгаа гэх бөгөөд энэ удаагийн сонгуулиар “аз нь шовойсон” зарим аймгийн засаг дарга нар тэрхүү нэрс дунд байгаа аж. Тухайлбал Өвөрхангай аймгаас сонгогдсон УИХ-ын гишүүн Г.Ганболд тэндэрийн хороо хууль бусаар байгуулан эрх мэдлээ урвуулан ашиглаж улсад онц их хэмжээний хохирол учруулсан байж болзошгүй үйлдлийн талаарх мэдээлэл нь сөрөг хүчний зүгээс хуулийн байгууллагад ирээд байгаа бол аймгийн засаг даргаар ажиллаж байсан өөр хоёр ч гишүүн авилга албан тушаалын хэргээр шалгагдаж байгаа гэсэн мэдээлэл байна. Г.Ганболд өмнө нь орон нутгийн өмчийн “Баянтээг” ХХК-ийн захирлын хамт авилгын хэрэгт холбогдсныгоо үгүйсгэсэн ярилцлага өгч байсан юм.

Дашрамд дурьдахад УИХ-ын гишүүд нь халдашгүй бүрэн эрхтэй гэсэн ойлголтыг шүүх Ж.Эрдэнэбатын талаарх шийдвэрээрээ үгүйсгэсэн бөгөөд авилга албан тушаалын хэрэгт хоблогдсон хэн боловч ял шийтгэлээ амсах ёстой гэсэн байр сууриа албан ёсоор илэрхийлсэн билээ.