Иргэдийн санаачилга болон нийгмийн асуудлуудыг олон нийтэд хүргэх зорилготой change.org сайт дээр ОХУ-ын нэгэн иргэн сонирхолтой өргөх бичиг байршуулжээ. Энэ өргөх бичгийг санаачлагч нь "оросуудын бүхий л удам угсааны нэрийн өмнөөс" 240 жилийн туршид татар-монголын дарлалд байсны төлөөх нөхөн төлбөрийг Монгол Улсын Засгийн газар болон Европын Холбоо өгөх ёстой гэсэн байна.
"BLM хөдөлгөөнөөс үлгэр дуурайл аван би энэхүү өргөх бичгийг гаргаж байна. Энэ хөдөлгөөнийг олон зууныг боолчлол, дарангуйлал дунд өнгөрөөсөн хүмүүсийн үр удам өөрсдийн эрхийн төлөө байгуулсан бөгөөд хөдөлгөөн тодорхой үр дүнд хүрсэн юм. Тиймдээ ч би үүнийг хараад энэхүү бичгийг байршуулж байна. Би ч мөн тэдэнтэй адил мэдрэмж амсаж байсан, өмнө нь үүнийгээ хэрхэн дүрслэн илэрхийлэхээ мэдэхгүй байлаа. Харин одоо би:
-240 жил Монголын дарлал дунд байсан!
-240 жил татвар татаас төлж байсан
-240 жил Монголын дарлалаас төв болон баруун Европыг хамгаалах бамбай болж байсан
-өөрсдөө дарангуйлалд, соёл болон эдийн засгаа хөгжүүлэх боломжгүй байх үедээ 240 жилийн туршид Европд хөгжин цэцэглэх боломж олгосон оросуудын үр удам гэдгээ мэдэж байна" хэмээн өргөх бичигт өгүүлсэн байна.
Түүнчлэн "бүхий л оросуудын үр удмын нэрийн өмнөөс" 240 жилийн туршид төлсөн оросуудын татаасыг Монголоос, Европын холбооноос 240 жил соёл болон эдийн засгийн уналттай байсны төлөөх нөхөн төлбөрийг 1260 оноос хойш хүү тооцон төлөхийг шаардаж байна гэжээ.
Энд дуулгахад, дээрх өргөх бичгийг байршуулсан Change.org нь иргэдийн санаачилга болон нийгмийн асуудлуудын шийдлийг олон нийтэд хүргэх, дэмжлэг авах зорилготойгоор өргөх бичиг байршуулдаг цахим хуудас юм. 2018 онд энэ цахим хуудас дэлхий даяар 265 сая гаруй хэрэглэгчтэй болжээ.
Г.Бямбасүрэн