"Хил хязгааргүй гол мөрөн" олон улсын экологийн эвсэл Монголын нутаг дэвсгэр дээр баригдаж буй усны далан ЮНЕСКО -ийн Дэлхийн байгалийн өвд бүртгэгдсэн "Даурын ландшафт"-д аюул заналхийлж байна гэж үзэн ЮНЕСКО-д гомдол гаргасан талаар "Сибирь Реалии" мэдээллээ.
Эх сурвалжийн мэдээлснээр "Хил хязгааргүй гол мөрөн" эвслийн Орос, Монгол экологичид "Даурын ландшафт"-ын усны гол эх үүсвэр болох Улз гол дээр томоохон хэмжээний байгууламж барьж байгааг сансрын хиймэл дагуулаас авсан зурагнуудаас олж мэдсэн гэнэ.
Барилгын ажлыг Монгол улсын эрх баригчдын заавраар "гол татарч хатахаас урьдчилан сэргийлэх" зорилгоор байгуулж байгаа гэх бөгөөд дараагийн удаад Монголын бусад хилийн усны гадаргуу дээр далан барих ажлаа идэвхжүүлэх зорилготой байж болзошгүй гэж экологичид мэдэгджээ.
"Энэ даланг байгуулах жинхэнэ зорилго нь шинээр усан зангилаа үүсгэх гэдэгт бид эргэлзэхгүй байна. Учир нь Улз голын ай савын ус ашиглагчдын 80 орчим хувь нь Монголын уул уурхайн компаниуд байдаг. Өөрөөр хэлбэл Байгалийн өвийн хосгүй объект ашигт малтмалын олборлолт, боловсруулалтыг нэмэгдүүлэх гэсэн зорилгоос болж усгүй болох нь" хэмээн "Хил хязгааргүй гол мөрөн" Оросын эвслийн зохицуулагч Александр Колотов өгүүлжээ.
Экологийн эвсэл Монголын эрх баригчдаас Улз гол дээрх далан байгуулахаа зогсоох, төслийн хүрээлэн буй орчинд үзүүлэх нөлөөллийн үнэлгээ хийхийг шаардаж байсан гэж эх сурвалж онцолжээ.
Г.Бямбасүрэн