ХҮН-аас Сүхбаатарын талбайгаас мэдээлэл хийлээ. Тус намын гишүүүд "Манай намын гишүүн байсан, одоо больсон хэсэг нөхөд шүүгчид ганцхан хуудас цаас өгөөд л ХҮН-ыг сонгуульд оролцуулахгүй байх шийдвэр гаргуулсан байна" гэдгийг онцлов.

О.Бямбадэлгэрийн нэхэмжлэлтэй, Нийслэлийн сонгуулийн хороонд холбогдох /Хөдөлмөрийн үндэсний намын бүртгэлтэй холбоотой/ маргаан бүхий захиргааны хэргийн урьдчилсан хэлэлцүүлэг 2020 оны 09 дүгээр сарын 29-ний өдөр Нийслэл дэх Захиргааны хэргийн анхан шатны шүүхэд болж өндөрлөсөн.

 

Урьдчилсан хэлэлцүүлгээр нэхэмжлэгчийн зүгээс Нийслэлийн сонгуулийн хорооны 2020 оны 09 дүгээр сарын 16-ны өдрийн 21 дүгээр тогтоолыг түдгэлзүүлэх хүсэлт гаргасныг шүүхээс хангаж уг тогтоолыг түдгэлзүүлж, хариуцагч талаас гуравдагч этгээд оролцуулах хүсэлт гаргасныг хэрэгсэхгүй болгож шийдвэрлэсэн байна.

 

Учир нь:

 

Нэхэмжлэгчийн итгэмжлэгдсэн төлөөлөгчөөс маргаан бүхий захиргааны акт болох Нийслэлийн сонгуулийн хорооны  2020 оны 09 дүгээр сарын 16-ны өдрийн 21 дүгээр тогтоолыг түдгэлзүүлэх хүсэлт гаргасныг Захиргааны хэрэг шүүхэд хянан шийдвэрлэх тухай хуулийн 61 дүгээр зүйлд зааснаар түдгэлзүүлж шийдвэрлэв.

Учир нь Хөдөлмөрийн Үндэсний намын нийслэлийн сонгуулийн хорооны даргыг сонгосон 2020 оны 08 дугаар сарын 08-ны өдрийн 03 дугаар тогтоолыг хүчингүй болгуулах шаардлагаар Сүхбаатар дүүргийн иргэний хэргийн анхан шатын шүүхийн 2020 оны 09 дүгээр сарын 15-ны өдрийн шүүгчийн захирамжаар иргэний хэрэг үүсгэн хэрэг хянан шийдвэрлэх ажиллагаа явагдаж байна. 

 

Иргэний хэргийн шүүхэд үүссэн нэхэмжлэлийн шаардлагаас үзвэл Хөдөлмөлрийн Үндэсний намын дотоод зохион байгуулалт, үйл ажиллагаатай холбоотой маргаан байх бөгөөд уг маргаан эцэслэн шийдэгдээгүй байхад тус улс төрийн намын орон нутгийн сонгуульд оролцох, уг намаас нэр дэвшигчдийг бүртгэсэн нь хууль бус эсэх асуудлыг Захиргааны хэргийн шүүх хэлэлцэн шийдвэрлэх хууль зүйн боломжгүй. 

 

Энэ шийдвэрийг эсэргүүцэж УИХ-ын гишүүн Т.Доржханд "ХҮН, Ардчилсан намд нэгдээгүйн төлөө ийм увайгүй үйл ажиллагаа явуулж байна. Энэ бүхний ард Монгол Улсын Ерөнхийлөгч Х.Баттулга байгаа гэж шууд хардаж байгаа. ХҮН хэн нэгэнд худалдагдахгүй.

Энэ бол хуулийн талаас тайлбарлахад ор үндэсгүй гүтгэлэг. Монгол Улсын Үндсэн хуульд иргэн бүр сонгох сонгогдох эрхтэй гээд заачихсан байгаа. Гэтэл нэг захиалгын шүүгчийн шийдвэрээр Монгол иргэдийн сонгох, сонгогдох эрхийг хязгаарладаг болчихсон байна. Тийм учраас бид ардчиллаа хамгаалж, ардчилсан орон байх уу үгүй юу гэдгээ шийдэх хэрэгтэй байна. Энэ бол сонголтгүй сонгуулийг иргэдэд тулгах үйл ажиллагаа гэж харж байгаа.

Орон нутгийн сонгууль"дагавар хүүхэд" биш. Энэ бол Монгол Улсын төв нийслэлийнхээ Засаг даргыг сонгодог, иргэдийн эрүүл аюулгүй орчинд амьдрах боломжийг бүрдүүлдэг сонгууль. Бидэнд 24 цагийн дотор холбогдох тайлбар, хариу өгөхгүй бол тэмцлийн хурц хэлбэрт шилжинэ" гэлээ.