Дорноговь аймгийн Улаанбадрах сумын ураны  үйлдвэрлэлийн орчимд шинжилгээ хийсэн ажлын баг дүгнэлтээ танилцууллаа.

Мал эмнэлгийн газрын дарга Д.Түмэндэмбэрэл:

-Дорноговь аймгийн Улаанбадрах суманд үйл ажиллагаа явуулж байгаа “Бадрах энержи” компанийн ажлыг хянан шалгах үүрэг бүхий ажлын хэсэг байгуулсан. Нийтдээ 26 хүний бүрэлдэхүүнтэй. Энэ багт мэргэжлийн шинжээчид ажиллалаа. Хүний эрүүл мэндийн, цацрагийн, малын эрүүл мэндийн, хөрс, ус ургамлын, үйл ажиллагааны, хэвлэл мэдээллийн гэсэн чиглэлүүдэд судалгаа хийсэн.

Цөмийн энергийн комиссын ажлын албаны дарга Э.Нямдаваа:

-Цацрагийн өндөр тун гарсан цэгүүдэд хэмжилт хийсэн. Энэ цэгээс 10-100 метр орчим тодорхой зайд холдоход цацрагийн тун хэмжээ байгалийн ердийн түвшиндээ хүрдэг. Эндээс малчдын эрүүл мэнд, хүн ардад ямар нэгэн өндөр тунгийн хорт нөхцөл байхгүй. Улаанбадрах сумын иргэд тайван байж болно. Уснаас авсан дээжид ч мөн зөвшөөрөгдөх хэмжээнд байна гэж гарч ирсэн.

МХЕГ-ын Байгаль орчны хяналтын улсын ахлах байцаагч У.Өлзийцэцэг:

-Орчны хөрс болон уснаас дээж авч шинжилгээ хийсэн. Хөрснөөс нийт 11 дээж авснаас зургаа нь зөвшөөрөгдөх хэмжээнээс их гарлаа. Бусад дээжид зөвшөөрөгдөх хэмжээнээс хэтрээгүй. Унд ахуйн зориулалттай, малчдын гүний худаг, 4-65 метрийн гүнтэй 12-85 км зайтай 16 худаг, нэг булгийн уснаас дээж авсан. Үүнээс 4 худаг эрсдэлт хатуулаг өндөртэй гэж гарсан. Хүнд металлын шинжилгээгээр уг дөрвөн худаг уран зөвшөөрөгдөх хэмжээнээс 4,4-11 дахин их гэж гарсан. Тухайлбал: Гүн Сухайт, Хонгорын ус, Дэнгийн ус, өвгөн мод, цагаан эрэг, наймаа булаг шандны худгийн ус нь удаан хугацаагаар ашиглавал хүний эрүүл мэндэд ноцтой аюул учруулна. Иймд энэ худгийн усыг зайлшгүй цэвэршүүлж уух зөвлөмжийг өгч ажиллагаа.

Гадаргын усны томоохон төлөөлөл болох Баруун баян булгийн ус бий. 2015 онд хийж байсан судалгаатай харьцуулахад маш их эрдэсжилттэй, хлор, сульфат, ураны агууламж өндөртэй гэж гарсан. Энэ усыг цаашид хүн, мал ахуй хэрэглээнд хэрэглэхэд нэн тохиромжгүй.  Ажлын хэсгээс уг булгийг хашаалуулж, хүн, мал хэрэглэхийг хориглох зөвлөмж өгсөн.

ЭМЯ-ны Эмнэлгийн тусламжийн хэлтсийн дарга Жаргалсайхан:

-Хүний эрүүл мэндтэй холбоотой ажлын дэд хэсэг зургадугаар сарын 05-08 хооронд Дорноговь аймгийн Улаанбадрах сумын нутагт газар дээр нь очиж ажилласан. Улаанбадрах сумын Зүүнбаян багийн 200 орчим иргэнээс асуумж судалгаа авлаа. Улаанбадрах сумын Зүүнбаян багийн хүн амын өвчлөл нь Дорноговь аймгийнхаа түвшинтэй ойролцоо гарсан. Уранаас гадна түүнийг олборлоход хүхрийн хүчил ашиглаж байгаа нь хөрс ундны усаар дамжиж, хүний эрүүл мэндэд сөргөөр нөлөөлж байна гэсэн айдас бухимдал тус нутгийн иргэдэд байлаа.

Мал эмнэлгийн ерөнхий газрын Мал амьтны эрүүл мэндийг хамгаалах газрын дарга Т.Тунгалаг:

-19 өрхийн 330 орчим малаас дээж авч лабораторид шинжиллээ. Уг шинжилгээгээр малын эрүүл мэндэд зөвшөөрөгдөх хэмжээнээс илүүгээр эмгэг үүсгэх нөхцөл тогтоогдоогүй гэлээ.

Э.Үүрийнцолмон