Аравдугаар сарын тавны өдөр Киргизийн нийслэл Бишкек хотноо тус улсын хууль тогтоох хурлын сонгуульд долоон хувийн санал авах босгыг давж чадаагүй намуудын дэмжигчдийн оролцсон эсэргүүцэл өрнөжээ. Нийслэлийн гудамжуудад Парламентын сонгуулийн дүнг эсэргүүцсэн олон цуглаж, хүчнийхэн тэднийг тараах гэсний улмаас мөргөлдөөн гарсан талаар Оросын хэвлэлүүд мэдээлжээ. 

Известия агентлагийн мэдээлснээр, хууль сахиулах байгууллагын ажилтнууд жагсагчдын эсрэг резинэн сум, нулимс асгаруулагч хий, гэрэлт дуут гранат ашигласан байна. Жагсагчид эсэргүүцэл үзүүлэн, хууль сахиулагчдын эсрэг чулуу нүүлгэжээ. Мөн тэд цагдаа нартай мөргөлдөхөд бэлтгэн мод, саваа, төмрөөр зэвсэглэсэн байсан гэнэ.

Жагсагчид, хууль сахиулагчдын хооронд болсон мөргөлдөөний улмаас Бишкек хотноо 130 орчим хүн гэмтэж бэртсэн талаар Киргизийн Эрүүл мэндийн яам мэдээлснийг Regnum агентлаг дамжуулжээ. тэдний дунд хууль сахиулагчид ч багтаж байгаагийн дээр олон хүн эмнэлгийн тусламж авсныхаа дараа эмнэлэгт хэвтэхээ татгалзсан гэнэ.

News.ru агентлагийн мэдээлснээр, мөргөлдөөний улмаас хичнээн хүн гэмтэж бэртсэн талаарх нарийвчилсан тоо гаргах боломжгүй байгаа аж. Мөргөлдөөн гарах үеэр Бишкек хотноо үүрэн холбооны сүлжээг тасалсан байсан гэнэ. Тухайн үед олон нийтийн сүлжээгээр төв талбайд ойр гэртэй хүмүүсийг гэрийнхээ интернетийн нууц үгийг цуцалж, эсэргүүцэгчдэд интернет ашиглах боломж олгохыг уриалж байжээ.

Киргизийн үймээн: 20 жилд хоёр хувьсгал туулсан Киргиз

Эсэргүүцэгчид Парламентын ордныг эзэлж, Атамбаевыг суллав

Сонгуулийн дүнгээс үүдсэн эсэргүүцлийн ажиллагаа асар богино хугацаанд эмх замбараагүй байдал болон өрнөсөн байна. Жагсагчид эхлээд Парламентын ордныг эзэлж, дараа нь Киргизийн Үндэсний аюулгүй байдлын улсын хорооны  харьяа хорих ангийн хаалгыг ачааны тэргээр дайрчээ. Энд өнгөрсөн зун ялын тогтоол сонссон Киргизийн Ерөнхийлөгч асан Алмазбек Атамбаев хоригдож байсан юм. 

Regnum агентлагийн мэдээлснээр, 10 дугаар сарын зургаанд шилжих шөнө эсэргүүцэгчид хорих ангийн барилга руу машинаар дайрч, нутаг дэвсгэр рүү нь нэвтрэн орсныхоо дараа удирдлагуудтай нь хэлэлцээр хийн Атамбаевыг суллахыг шаардсан байна. Энэ хэлэлцээрийн дүнгээр Алмазбек Атамбаевыг 10 дугаар сарын зургааны 02:00 цаг орчимд суллажээ. Эх сурвалжийн мэдээлснээр эсэргүүцэгчдийн дунд Атамбаевын бага хүү Сейитбек Атамбаев байсан гэх бөгөөд тэрбээр сонгуульд ялагдсан "Кыргызстаны социал-демократууд" намын удирдлагын төлөөлөлд багтдаг аж.

Түүнчлэн энэ эргэлтийн үеэр 2017 онд хүн барьцаалсан хэргээр ял сонссон Парламентын гишүүн асан Садыр Жапаровыг мөн хорих ангиас суллажээ. Мөн Бишкекийн дулааны цахилгаан станцын шинэчлэлийн ажлын үеэр авлига авсан хэргээр буруутгагдсан Ерөнхий сайд асан Сапар Исаковыг суллахыг жагсагчид шаардсан байна.

Ялагч дахин сонгуульд бэлэн 

Ийнхүү Киргизд үймээн гарсны дараа тус улсын Ерөнхийлөгч Сооронбай Жээнбеков парламентын сонгуулийн дүнг эсэргүүцсэн олныг ухаалаг хандахыг уриалсан байна. Түүнчлэн Киргизийн парламентын сонгуульд ялалт байгуулсан "Биримдик" нам дахин санал хураалтад бэлэн байгаа талаар тус намын хэвлэлийн нарийн бичгийн дарга Адилет Султаналиев мэдэгджээ. 

РБК агентлагийн мэдээлснээр, одоо бараг бүх жагсагч 10 дугаар сарын таванд эсэргүүцэл зохион байгуулсан Ала-Тоо талбай дээр цугласан хэвээр байгаа гэнэ. Зарим эх сурвалжийн мэдээлснээр, Бишкекийн төв талбай дээр удирдагчид нь гарч ирэхийг жагсагчид хүлээж байгаа аж.

Энд дуулгахад, Киргизийн парламентын сонгууль 10 дугаар сарын дөрөвний өдөр болсон. Энэ сонгуульд тус улсын улс төрийн 40 гаруй нэгдэл оролцоно гэж мэдэгдэж байсан ч ихэнх нь оролцохоос татгалзаж, мөн зарим нь Сонгуулийн төв хороонд шаардлагатай баримт бичгээ бүрдүүлж өгч амжаагүй байна. Ингээд сонгуульд 16 нам оролцож, парламентын 120 суудлын төлөө өрсөлджээ. Киргизийн хуулиар намууд сонгуульд оролцсон ирэгдийн долоон хувь, долоон муж тус бүрт 0,7 хувиас багагүй санал авах ёстой юм байна. Урьдчилсан дүнгээр "Биримдик" нам 46 суудал, "Мекеним Кыргызстан" нам 45 суудал, "Кыргызстан" 16, "Бутун Кыргызстан" 13 суудал тус тус авчээ.

Киргизийн хямрал: Атамбаевыг юунд буруутгаж байгаа вэ? 

Киргизийн үймээн: 20 жилд хоёр хувьсгал туулсан Киргиз

Г.Бямбасүрэн