Нийгмийн бодлогын байнгын хороо хуралдаж байна. Хуралдаанаар Эм, эмнэлгийн хэрэглэгдэхүүний тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэхийг шийдэж байгаа юм.  Хэлэлцэж байгаа асуудалтай холбогдуулан гишүүд асуулт тавьж, хариулт авч байгаа юм.

УИХ-ын гишүүн П.Анужин:

-Эрүүл мэндийн бүтээгдэхүүн юуг оруулж байна вэ? Эрүүл мэндийн бүтээгдэхүүнд хүнсний зүйлийг оруулж болохгүй. Өнөөдөр монгол хүний хэдэн хувь нь эмийн хамааралтай байна вэ?

ЭМ-ийн сайд Т.Мөнхсайхан: 

-Эрүүл мэндийн бүтээгдэхүүн гэж зохих хэмжээгээр хэрэглэдэг бүтээгдэхүүнийг хэлнэ гэж хуулийн төсөлд зааж өгсөн байгаа. Манай улсын хүн амын тэдэн хувь нь эмийн хамааралтай гэсэн статистик тоо баримт байхгүй. 

УИХ-ы гишүүн П.Анужин:

-Харамсалтай байна. Энгийн статистик байхгүй байна. Зовж, шаналж байгаа иргэн бүр эмийн хамааралтай байгаа. Эмийн бизнесийг яаж боловсронгуй болгох вэ гэхээсээ өмнө яагаад хүн эм уугаад байна вэ гэдгийг бодолцох хэрэгтэй. 

УИХ-ын гишүүн н.Сандаг-Очир:

-Эмийн жор бичилтийг цахим системд шилжүүлнэ гэж байгаа. Сум, хорооны эмнэлэг цахим системд хэр шилжсэн бэ? Мансууруулах болон сэтгэцэд нөлөөлөх эм бодист хяналт тавина гэж байгаа. Яаж хяналт тавих вэ? Сэтгэцэд нөлөөлдөг хүмүүс насны хувьд асар залуужсан байгаа. Хяналт тавьж байгаа зүйл алга. Цагдаагийн газарт ерөнхий боловсролын хүүхдүүд шалгагдаж байна гэсэн мэдээлэл бий. Яаж хяналт тавих вэ?

ЭМ-ийн сайд Т.Мөнхсайхан:

-Хөнгөлөлттэй эмийг олгох цахим жор бичилт дээр бэлтгэл ажил хангагдаж байна. 11 дүгээр сараас цахимаар жор бичээд явна гэж төлөвлөж байгаа. Хуулийн байгууллага хяналт тавиад явна. 

УИХ-ын гишүүн Н.Чинбүрэн:

-Эмийн бодлогоо нэг дээвэр дор базах хэрэгтэй. Агентлаг дотроо хяналтаа хийгээд явах шаардлагатай. 

УИХ-ын гишүүн Ц.Мөнх-Оргил: 

-Мөнхсайхан сайд, та эмийн хяналтыг яаж сайжруулах талаар ойлголтгүй байна. Зайлшгүй шаардлагатай үнийг тогтооно гээд байна. Бүх эмийн үний, чанарыг зохицуулах хэрэгтэй. Үүнийг ч ойлгоогүй байна. Харамсалтай байна. 

Байнгын хорооны хуралдаан үргэлжилж байна. 

Н.Энх