Бүгд Найрамдах Солонгос Улсад томуугийн вакцин тариулсны дараа нас барсан хүний тоо 32 болсон талаар тус улсын Өвчний хяналт, урьдчилан сэргийлэх үндэсний агентлаг мэдээлжээ.
Эрх баригчдын мэдээлснээр, 10 дугаар сарын 16-наас хойш нийтдээ 32 хүн томууны вакцин хийлгэснийхээ дараа нас барсан байна. Эхний тохиолдол Инчонд гарсан бөгөөд 17 настай сурагч хүү амиа алдсан бол үүний араас Сөүл, Кёнгидо болон бусад нутгуудад ийм тохиолдол бүртгэгджээ. Нас барсан хүмүүсийн ихэнх нь ахмад насны, хууч өвчинтэй хүмүүс байсан гэж эмч нар өгүүлсэн байна.
Талийгаачдын цогцосыг задлан шинжилгээнд оруулах үеэр авсан дээжийг судлах зэргээр хүн амиа алсдан тохиолдол бүрийн шалтгааныг нарийн тодруулах ажил үргэлжилж байгаа гэнэ. Гэхдээ олон сая хүн хэдийнэ тарилга хийлгүүлсэн, тэдний биед сөрөг үр дагавар гараагүй гэж шинжээчид онцолсон байна.
Богино хугацаанд 30 гаруй нас баралт бүртгэгдчихсэн энэ үед вакцинжуулалтыг үргэлжлүүлэх нь зөв эсэх тал дээр мэргэжилтнүүд харилцан адилгүй байр суурьтай байгаа аж. Солонгосын эмч нарын холбоо 10 дугаар сарын 29 хүртэл томуугийн вакцинжуулалтыг зогсоох санал хүргүүлсэн байна.
Харин үүний хариуд БНСУ-ын Өвчний хяналт, урьдчилан сэргийлэх агентлагийн тэргүүн Чон Ын Гён мэдэгдэл хийхдээ вакцинжуулалт болон нас баралт шууд холбоотой гэдэг нь тогтоогдоогүй, өнөөгийн өнхцөлд вакцинжуулалтын хөтөлбөрийг зогсоох шаардлагагүй хэмээн онцолжээ.
БНСУ: Вакцин тариулсны дараа 13 хүн нас барсны шалтгааныг судалж байна
Г.Бямбасүрэн
Уншиж байна |