“Хэнийг ч хөгжлийн гадна үлдээхгүй” уриан дор “АСУУДАЛ ШИЙДЭЛ” сэдэвт харааны бэрхшээлтэй залуучуудын хэлэлцүүлэг болж байна. “Монголын Хараагүйчүүдийн Үндэсний Холбоо” ТББ-аас зохион байгуулсан энэ удаагийн хэлэлцүүлэгт УИХ-гишүүн Ч.Ундрам, Д.Сарангэрэл, Б.Саранчимэг, Б.Жаргалмаа, Т.Доржханд болон Хөдөлмөр, нийгмийн хамгааллын яам, Боловсрол, шинжлэх ухааны яам, харааны бэрхшээлтэй залуусын төлөөлөл оролцож байгаа юм.

Энэ удаагийн хэлэлцүүлгээр боловсролын хүртээмж сэдвийн хүрээнд “Төрөөс хөгжлийн бэрхшээлтэй залууст боловсрол эзэмшүүлэх талаар авч хэрэгжүүлж буй арга хэмжээ”, “Боловсрол эзэмшихэд харааны бэрхшээлтэй залууст тулгамдаж буй асуудал”, Хөдөлмөр эрхлэлтийн хүртээмж сэдвийн хүрээнд “Төрөөс хөгжлийн бэрхшээлтэй залуусын хөдөлмөр эрхлэлтийг дэмжих талаар авч хэрэгжүүлж буй арга хэмжээ” зэрэг илтгэлийг хэлэлцүүлэх аж.

Монгол Улсын хэмжээнд 11800 орчим харааны бэрхшээлтэй иргэн байдаг. Тэдний 30 хувь нь 18-30 насны хөдөлмөрийн насны иргэн юм. Эдгээр иргэдэд сурах, хөдөлмөрлөх тэгш боломж олгох нь төрийн бодлогын цөм байх ёстой гэдгийг хэлэлцүүлэгт оролцож буй талууд хэллээ. Бодит байдал дээр өнөөг хүртэл харааны бэрхшээлтэй иргэдэд сурах бичиг хүрэлцээгүй, шаардлагатай тоног төхөөрөмж байхгүй, хуулиар олгогдсон хөдөлмөрлөх эрхээ эдэлж чаддаггүй хүндрэлүүд бий.

Ч.Ундрам тэргүүтэй УИХ-ын эмэгтэй гишүүд дээрх иргэдийн сурч боловсроход шаардлагатай сурах бичиг, хэрэглэгдэхүүнийг бий болгох санхүүгийн эх үүсвэрийг 2021 оны төсөвт суулгах, хөдөлмөрлөх эрхийг хангах, хууль, эрх зүйн орчныг сайжруулахад онцгой анхаарч ажиллахаа илэрхийлсэн юм.

Э.Үүрийнцолмон