Хөл хориог сунгасан хугацаанд хэрэгжүүлэх арга хэмжээнүүд
2020-11-30

Засгийн газрын ээлжит бус хуралдаан болж бүх нийтийн бэлэн байдлын зэргийг нийслэл, Архангай, Сэлэнгэ аймагт 2020 оны 12 дугаар сарын 01-ний өдрийн 06.00 цагаас 2020 оны 12 дугаар сарын 11-ний өдрийн 06.00 цаг хүртэл сунгахаар болов.

 

Хурал зөвлөгөөн, жагсаал, соёл урлаг, спортын үйл ажиллагааг орон даяар хориглоно

Халдвар тархаагүй, бүртгэгдээгүй, тархалтыг хязгаарласан бусад аймагт бүх нийтийн бэлэн байдлын зэргийг 2020 оны 12 дугаар сарын 01-ний өдрийн 06.00 цагаас бууруулж 10 хоног өндөржүүлсэн бэлэн байдлын зэрэгт шилжүүлнэ. Өндөржүүлсэн бэлэн байдлын хугацаанд халдвараас сэргийлэх, тархалтыг зогсоох зэрэгтэй холбоотой ямар арга хэмжээ /худалдаа, үйлчилгээ, аймаг доторх тээврийн хэрэгслийн хөдөлгөөн гэх мэт/ авч хэрэгжүүлэхээ тухайн аймгийн Онцгой комисс, Засаг дарга шийдвэрлэх юм. Гэхдээ олон нийтийг хамарсан хурал, зөвлөгөөн, цуглаан, жагсаал, соёл урлаг, спорт, үзвэр үйлчилгээг орон даяар хориглосон хэвээр байна. Төрийн болон хуулийн этгээдийн ажлыг тусгай горимд шилжүүлэх, халдвар хамгааллын дэглэм мөрдүүлэх, аймаг хооронд, хот хоорондын хөдөлгөөнийг хязгаарлах зэргийг сайд нар болон агентлагийн дарга, бүх шатны Засаг дарга, хуулийн этгээдийн удирдлагад даалгалаа.

 

18 салбарын үйл ажиллагаад хязгаарлаагүй

Үүнд:

 

  • Эрчим хүч

  • Хүнсний үйлдвэрлэл, худалдаа, түгээлт, тээвэрлэлт

  • Газрын тосны бүтээгдэхүүн, түлшний хангамж, түгээлт, тээвэрлэлт

  • Хот, суурины ус хангамж, ариутгах татуургын ашиглалт

  • Эрүүл мэндийн байгууллага, эм, эмнэлгийн хэрэгслийн үйлдвэрлэл, ханган нийлүүлэлт

  • Банк, санхүү, хөрөнгийн бирж

  • Хэвлэл мэдээлэл, харилцаа холбоо, шуудан, илгээмж

  • Улсын онц чухал болон стратегийн ач холбогдол бүхий обьект, байгууллага

  •  Малын өвс, тэжээлийн үйлдвэрлэл, худалдаа, тээвэрлэлт

  • Гоо сайхны бүтээгдэхүүний үйлдвэрлэл

  • Арьс шир, ноос, ноолуур боловсруулах үйлдвэр

  • Сав, баглаа боодол, хэвлэх үйлдвэр

  • Модон эдлэл, барилгын хийц, материалын үйлдвэр

  • Бараа материалын цахим худалдаа, хүргэлт

  • УИХ, ИТХ, төрийн захиргааны байгууллага /тооны хязгаартай/

  • Тусгайлсан чиг үүрэг бүхий байгууллага

  • Шүүх, прокурор, өмгөөлөл, нотариат

  • Оршуулга чиглэлээр үйл ажиллагаа явуулах нь чөлөөтэй. Харин бусад байгууллага, хуулийн этгээд үйл ажиллагаа явуулахгүй юм.

 

Гадаад байгаа иргэдийг бэлэн байдлн зэрэг сунгасан 10 хоногт татаж авахгүй


12 дугаар сарын 10-ны дотор Архангай, Сэлэнгэ аймгийн иргэдийг Улаанбаатар хотоос явуулж, дээрх аймгуудад байгаа хотын иргэдийг Улаанбаатар хот руу нэвтрүүлэхээр төлөвлөж байна. Уул уурхайн салбарт ажиллаж байгаа ажилчдын ээлжийг 21 хоног болгож, тухайн аж ахуйн нэгжүүдийнх нь саналд үндэслэн ээлж солих хуваарь гаргаж эхэлжээ. Уурхайчид тусгайлсан цэгүүдэд шинжилгээ өгсний дараа ээлжээ солилцох юм. Гадаад улсад байгаа иргэдийг бүх нийтийн бэлэн байдлын зэргийг сунгасан 10 хоногт татаж авахгүй. 

 

Засгийн газар хөл хориог сунгасан 10 хоногийн хугацаанд хавьтлуудыг бүрэн илрүүлж, захиалсан амьсгалын аппаратуудаас эхний ээлжинд 200-г татан авч, бүх тусгаарлах байранд шалгалт хийн, эрүүл ахуй, халдвар хамгааллын дэглэм мөрдөх нөхцөл бүрдүүлэх, "нэг өрөө-нэг хүн, нэг өрөө-нэг гэр бүл" гэсэн зарчим барихаар төлөвлөжээ. Цаашлаад Шадар сайд Я.Содбаатар халдвар авсан иргэдийг хавьтлуудаа санаатай болон санамсаргүй байдлаар мэдээлэхгүй байгааг онцгой анхааруулж байсан. Халдвар авсан иргэд хариуцлагтай байхыг онцлон дурдсан. Мөн олон нийт ч хөл хорионы дэглэмийг чанд сахиж, мөрдөх нь эрүүл мэндээ хамгаалахаас гадна халдварын тархалтыг бууруулах иргэний хүний нэн тэргүүний үүрэг болоод байгаа юм. 

Н.Нягт

Shuud.mn
Сонин хачин